© 2021 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
An ger prëv, prÿv in Kernowek a’n jeves moy ès udn styr. In Kernowek Coth yma prëv prenn ow mênya ‘eruca, caterpillar.’ Warlergh Lhuyd yma prëv ow styrya ‘vermis, worm’. Pelha Lhuyd a re dhyn prëv nor ‘lumbricus, earthworm’ ha prëv owrlyn ‘silkworm’. I’n textow an ger prëv yw ûsys rag ‘serpont, sarf’, rag ensampyl: an Tas a wrug der intent in mesk oll preves an bÿs formya prëv henwys serpont (Creacyon an Bÿs). In Bêwnans Meryasek yma prëv ow mênya ‘dragon’: ha ny oll gwithys dyblans orth an dhragon, prëv an pla. In Resurrexio Domini hag in Bêwnans Ke ny a gav an lavar: in mesk preves ow tùchya pyt pò pryson. Dell hevel yma in mesk preves ow sygnyfia ‘among vermin, among insects.’ Apert yw nag yw dyblans styr prëv i’n tavas tradycyonal. Yma va ow referrya dhe vestas a lies sort, treghvilas, kenogas, cramvîlas, serpons ha dragons. Nyns yw hedna marthys, rag in Sowsnek Cres yth yw an ger worm ûsys dhe referrya dhe dreghvilas, dhe genogas, dhe dhewelvenegyon ‘amphibians’, dhe serpons ha dhe dhragons. In Kernowek hag in Sowsnek Cres yth hevel fatell usy prëv ha ‘worm’ aga dew ow mênya best vëth a vo ow slynkya wàr an dor pò ow terhy y honen in troyllyow. Styr an ger ‘worm’ in Sowsnek yw gwelys in fordh apert in whedhel dhyworth Conteth Durham gelwys Prëv Lambton ‘the Lambton Worm.’ An whedhel a dherif a John Lambton, den yonk dygabester. De Sul in le a vos dhe’n eglos, yma va ow pyskessa in Dowr Wear hag ow cachya best munys kepar ha pedrevan dhowr pò ‘newt’. Yma John ow cresy fatell yw an Jowl kechys ganso, hag ev a dôwl an best bian aberth in fenten ryptho. Rag gwil amendys rag y dhrog-omdhegyans yma va ow tyberth rag kemeres part i’n Crowscasow. In mên-termyn yma an Prëv ow tevy hûjes brâs, ha posnys dredho yw dowr an fenten. Hir lowr yw an best dhe drailya y honen seythgweyth adro dhe vryn. Yma an Prëv owth ownekhe oll an pow adro, ow tebry deves, hag ow sêsya flehes bian. Yma radn a’n gentrevogyon ow whelas ladha an Prëv. Nyns usons ow soweny bytegyns, rag kettel vo darn trehys dhyworth an Prëv, yma an darn ow jùnya arta dhe’n corf. Wosa seyth bledhen John a dhewhel tre. Warlergh omgùssulya gans gwragh, yma va ow corra spîkys orth y arvwysk hag owth assaultya an Prëv in cres an ryver. Kettel vo darn trehys dhyworto, yth yw an darn scubys in kerdh gans an fros heb jùnya arta dhe gorf an euthvil. An wragh a lever dhe John bos res dhodho, mar teu va ha dystrôwy an Prëv, dhe ladha an kensa tra a wrella metya ganso wàr y fordh tre. Acordys yw y das dhe delyfrya an ky in mes rag y dhynerhy, saw mar lowen yw y sîra an euthvil dhe vos ledhys, mayth usy ev owth ankevy an acord. An kensa tra dhe vêtya John ytho yw y das. John bytegyns a ladh an ky, saw y deylu yw molethys bys pedn naw denethyans.