© 2021 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma lies huny complys i’n Beybel nag yw rÿs aga henwyn. Der an osow nyns o pùbonen contentys gans an lack-na ha henwyn a veu desmygys rag an persons dyhanow. Y hyll radn a’n henwyn-na bos gwelys i’n textow Kernowek. Caym hag Abel yw mebyon Adam hag Eva. I’n Beybel nyns yw complys wheryth an vreder, saw res yw an wheryth-na dhe vos aga gwrageth inwedh. Yma penfentydnyow avês dhe’n Beybel ow qwil mencyon a hanow whor ha gwre’ty Caym. Yth yw hy hanow complys in Creacyon an Bÿs kefrÿs. Warlergh ladha y vroder Abel, yma Caym ow porposya mos gans y wreg dhe wandra i’n gwylfos. Ev a lever: Calmana ow whor, fysten, gas ny dhe vos alemma. Calmana ytho yw y whor ha’y wreg. In awayl Sen Lûk ny a red a’n beggyer Lasser ha’n den rych. Nyns yw an den rych henwys, saw dell yw ûsys, ev yw gelwys Dives, an Latyn rag ‘den rych’. In gwary y vêwnans Meryasek a lever: A Dîvês dell redyn ny rych lowr o in pùb termyn. Pyth êth y ena defry? Dhe iffarn dhe’n pain bylen. In awayl Lûk yth yw derivys fatell veu Jesus crowsys inter dew lader. Onen anodhans o edrygys saw y gela o cales in y begh. Nyns yw henwyn an ladron complys i’n Awayl. Yth yw an henwyn, Dysmas ha Jesmas, complys kyns oll i’n text apocryfal Actys Pylat. Pelha in Passio Christi Pylat a lever: May fo crowsys ow brës yw Dysmas, Jesmas ha Jesu. In apocryfa an Testament Nowyth yma benyn ow metya gans Jesu wàr y fordh bys in Mownt Calvary hag yma hy ow clânhe fâss agan Savyour gans lien hag yth yw fâss Crist impryntys warnodho. Nyns yw an venyn-na complys in tyller vëth i’n Testament Nowyth saw yma lies huny ow cresy hy dhe vos person istorek dre rêson a’n mencyon gwrÿs anedhy i’n devôcyon Catholyk Stacyons an Grows. I’n apocryfa an venyn yw gelwys Berenike poken Veronica. Nyns yw Veronica complys in Passio Christi, saw hy yw kefys gans hy lien in Resurrexio Domini. Dell hevel yth o an hanow Veronica re hir rag lînednow an gwersyow Kernowek, hag ytho y feu an hanow cot’hës dhe Vernona. In Resurrexio Domini ny a red: Ow hanow yw Vernona; fâss Jesu genef yma in hevelep gwrÿs a’y whës. Martesen yth yw an dus dyhanow moyha a bris i’n Beybel an dus fur neb a ros royow dhe Jesus nowyth genys. An dus fur o sterdhewynyon dhyworth Babylon. Nyns yns y complys in Kernowek ma’s in trailyans Wella Kerew. Ny lever an scryptour aga bos try in nùmber. Y feu hedna conclûdys dhyworth aga thry ro: owr, incens ha myrr. Ny lever an scryptour y dhe vos myterneth naneyl. Y feu hedna desmygys martesen wàr fùndacyon salm wheg deg eth: Dre rêson a’th templa in Jerùsalem myterneth a wra don dhis royow. Henwyn tradycyonal an dus fur yw Melchior, Ebrow rag ‘golow yw ow mytern’; Caspar growndys wàr kesef ‘arhans, tresour’ ha Baltazar, usy ow styrya ‘gwra dyffres an mytern’.