© 2022 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
In tradycyons an Jermans yma spryjyon henwys kobolde. Y yw bùckyas bian hag yth yw leverys fatell usy meur anodhans tregys in dadn an dor hag y dhe vos tus bal. In whedhel an Vreder Grimm, ’Gwydn Ergh ha’n Seyth Corryk’, yma an corrygas owth obery avell paloryon mûn. Apert yw ytho fatell êns y prederys dhe vos kobolde. Avês dhe’n whedhel-na y fedha an kobolde blâmys yn fenowgh rag droglabmow i’n bal. In whêtegves cansvledhen yth o cresys fatell wre an kobolde dynya tus bal dhe gemeres mûn nag o valew vëth ino. In contrary part venemys o. Wàr an dyweth dyscudhys veu fatell o metol nowyth an stoff re beu ascrîbys dhe’n kobolde. An metol a veu henwys cobalt rag perthy cov a’n grejyans-na. In Sowsnek an bùcka bal a vedha gelwys bluecap. In Kembrek an kobold yw aswonys avell coblyn. In Sowsnek Kernow bùckyas bal yw gelwys ‘knockers’. In Kernow yth esa an dus bal ow cresy fatell esa rychys brâs dhe gafos i’n radn-na a’n bal may fedha clôwys sowndys a wonys an bùckyas. Dell o ûsys nyns o tus bal parys dhe venturya bys i’n partys-na, na fors pana vrâs a vedha an gober offrys dhodhans. Yth yw leverys bytegyns fatell o den coth ha’y vab tregys ogas dhe Bosporthenys. Udn nos Golowan y aga dew êth in mes hag a wortas erna wrussons y gweles an bobel vian ow tos in bàn in mes a’n bal ha mûn owr gansans. Y fedha leverys fatell wodhya an den coth ha’y vab kevrînyow tavas an bobel vian hag ytho fatell yllens y kemenessa gansans. An den coth ha’y vab a wrug acord gans an bùckyas. Condycyons an acord o kepar dell sew: an den ha’y vab a vydna dry in bàn in mes a’n bal an dhegves radn a’n mûn moyha rych. Hag ena y a vydna y dhyghtya ha’y asa rag an bobel vian, wàr an ambos an bùckyas dhe rauntya dhodhans an part-na a’n bal esa oll an mûn rych ino. An den ha’y vab a sewyas aga radn a’n acord ha warlergh termyn cot y dhendylas meur a vona. Ny wrug an den coth fyllel bythqweth dhe gollenwel an bargen gwrës gans an dus vian. Ev a wre gasa pùpprës an dhegves radn a’n mûn rag an bùckyas. Ev a verwys. Y vab bytegyns o crefny hag ùnkynda. Ev a whelas gwil falsury dhe’n bobel vian, in spît dhe’n kevambos gwrës gansans. Goodh an mûn a wrug fyllel. Ny ylly an mab spêdya gans tra vÿth. Ev a dhalathas eva re ha scùllya oll an mona gwrës gans y sîra. Pàn verwys ev, an mab o bohosak hag in otham brâs.