(35) Casvelyn


© 2016 Nicholas Williams

Pùb gwir gwethys / All rights reserved


Clyckya obma ha goslowes / Click here to listen

Casvelyn.m4a


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Jûlyùs Cesar a dheuth dhe Vreten an kensa treveth i’n vledhen pymp ha hantercans dhyrag Crist rag yth esa an Vretons ow qweres pobel Gal warbydn an Romans. Ny wrug an viaj soweny ha’n Romans a omdednas. An nessa bledhen Cesar a gùntellas lu brâs. Ev a’n jeva ganso pymp lyjyon ha dyw vil varhak, hèn yw adro dhe bymp mil warn ugans soudour. Cassivellaunùs chyften an Catuvellauni, trib esa tregys i’n pow dhe’n north a Dhowr Tamys o hùmbrynkyas an Vretons. Pàn wrug Cesar ha’y army drehedhes Dowr Tamys, an ryver o crefhës gans stykednow lybm an ladn ahës hag in dadn an dowr kefrÿs. An Romans a spêdyas dhe gerdhes dres an ryver bytegyns hag entra in tireth Cassivellaunùs. Cassivellaunùs a’n jeva lies escar in mesk trîbys erel an Soth-Ÿst a Vreten. Radn anodhans a jùnyas orth an Romans warbydn Cassivellaunùs ha kyn whrug ev omlath yn hardh res o dhodho wàr an dyweth omry dhe Cesar. Cesar a gemeras gwystlow pò hostages dhyworto ha Cassivellaunùs a bromysyas danvon trybût dhe Cesar. Ena Cesar a dhepartyas in mes a’n enys heb gasa soudour Roman vëth wàr y lergh. Ny woryn ny mar peu an trybût tyllys bythqweth. Kyn na wrug Cassivellaunùs cafos an vyctory warbydn Cesar, res veu dhe’n Roman brâs gasa Breten heb cafos tra vëth dhyworth y secùnd viaj, ha pelha ny ylly Cesar conqwerrya Breten. Dre rêson a hedna Cassivellaunùs a veu gwrës gorour pò hero brâs in tradycyon an Gembrion, hag y a’n gelow Caswallon mab Beli. Yma lies whedhel desmygys adro dhodho ha scant nyns eus gwiryoneth istorek in onen vëth anodhans. I’n Triasow Enys Breten ‘The Triads of the Island of Britain’ yth yw leverys fatell wrug Caswallon alowa an Romans dhe dhos dhe Vreten yn chyffar rag margh teg henwys Meinlas. Leverys yw inwedh fatell wrug Caswallon gasa Breten in udn helghya Cesar gans moy ès ugans mil soudour ha na wrug ev dewheles bythqweth. Apert yw nag yw Caswallon i’n tradycyon Kembrek tra vëth ma’s person a wrug whedhlow cùntell adro dhodho. Yth yw Caswallon campollys in Kernowek kefrës—i’n gwary Bewnans Meryasek. Cristyon yw Dûk Kernow i’n gwary hag yma va ow whelas fetha Tewdarùs, emprour. Tewdarùs a gomond dhe’n Dûk naha y grejyans poken ev a vëdh dalhednys ganso ha prysonys ‘kyns haneth i’n nos’. Ha rag y ownakhe dhe voy yma Tewdarùs ow codros fatell wra peswar mytern dos rag y weres warbydn an Dûk. An vyterneth yw an re-ma: Mytern Alwar ha Pygys, Mytern Margh riel kefrÿs, Mytern Casvelyn gelwys. Mytern Casvelyn heb dowt yw Caswallon. Wostallath ev o chyften Brethonek neb a werryas warbydn Jùlyùs Cesar. Nyns ywa i’n text-ma ma’s pagan yw y hanow ûsys rag gorra own in Dûk Cristyon Kernow.