© 2022 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Macbeth (in Scot-Godhalek Mac Beatha) o esel a deylu Loarn, is-scoren a’n teylu rial. Ev o chyften pow Moray in North-Ÿst a Scotland. I’n vledhen mil ha dew ugans y feu batel inter Macbeth ha’y genderow Donnchadh (‘Dùncan’), mytern Scotlond. Dùncan a veu ledhys ha Macbeth a gafas an gùrun. Macbeth a exîlyas in mes a’n wlascor Malcolm ha Dónall Bàn, mebyon Dùncan. Gwre’ty Macbeth o Gruach, myrgh wydn an Secùnd Kenneth, mytern Scotlond dhyrag Dùncan. Rain Macbeth a dhuryas seytek bledhen, hag ev o onen a vyterneth Scotlond moyha a vris i’n unegves cansvledhen. Macbeth êth wàr brierynsys dhe Jerùsalem ha leverys yw kefrës fatell o va pòr larj dhe’n vohosogyon. Nyns o rain Macbeth re gosel bytegyns. Rag ensampyl, yth esa strîf intredho ha’n Vîkyngas in Scotlond. Pelha Edward Confessour, mytern an Sowson, a dhavonas Siward, yùrl Northùmbrya, dhe Scotlond gans lu brâs dhe omlath warbydn Macbeth. Batel a veu jùnys intredhans wàr vre Dùnsinan i’n vledhen mil ha pymp deg peswar. Teyr bledhen warlergh hedna Malcolm, mab an mytern kyns, a ladhas Macbeth in ken batel ha Malcolm a veu mytern Scotlond warlergh Macbeth. Mar teun ny ha meras orth Macbeth, an gwary gans Shakespeare, ny a wel nebes dyffransow inter whedhel Shakespeare ha’n gwiryoneth istorek. An rêson rag hedna yw dhe weles in penfentyn Shakespeare rag bêwnans Macbeth, hèn yw Cronyclys Raphael Holinshed, lyver a veu dyllys tro ha dyweth an whêtegves cansvledhen. Yma taclow haval dhe Shakespeare in lyver Holinshed bytegyns. Rag ensampyl i’n dhew dext yth yw gwreg Macbeth leun a uhelwhans hag yma hy ow tesîrya bos myternes. Saw yma dyffransow inter Holinshed ha Shakespeare inwedh. In Holinshed rag ensampyl nyns yw Banquo dhe drestya, saw in gwary Shakespeare Banquo yw vyctym inocent yw ledhys gans Macbeth rag surhe y wlascor. I’n dhew dext yma Macbeth ha Banquo ow metya gans persons gornaturek. Ymowns y ow profusa fatell vëdh Macbeth mytern i’n dedhyow usy ow tos. Hag ot dyffrans brâs inter whedhel Holinshed ha gwary Shakespeare: natur an re-na usy ow targana dedhyow devedhek Macbeth. Herwyth Holinshed an teyr benyn usy ow metya Macbeth yw “spyryjyon a’n forest hudol… nymfow pò fayes”. In gwary Shakespeare wàr an tenewen aral, y yw gwrahas, hager-venenes uthyk. Y feu Macbeth performys rag an kensa prÿs i’n vledhen mil whe cans ha whe. Mytern Pow an Sowson i’n termyn-na o an kensa Jamys. Ev o mytern Scotlond moy ès ugans bledhen dhyrag hedna. Pàn esa Jamys whath in Scotlond, ev a dhyllas lyver in dadn an tîtel Daemonologie. I’n lyver-na yma va ow ry y dybyansow ow tùchya nygromans ha gwrahas. Yma va kefrÿs ow styrya prag yth ywa lafyl hag ewnhensek rag Cristonyon dhe gompressa gwrahas. Macbeth yw gwary usy ow tyghtya mytern Scotlond, hag yth yw an gwrahas ino meur dhe vlâmya. Nyns yw cales ragon ny ytho gweles prag y whrug Shakespeare screfa y wary Macbeth i’n termyn hag i’n form may whrug ev.