© 2022 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In Kernowek dell hevel yth esa wostallath try degrê a bellder. Hèn yw dhe styrya, y whre an tavas decernya inter try thyller. Kensa, omma— i’n tyller-ma, rybof vy pò ogas dhybm. Secùnd: ena—i’n tyller-na, rybos jy pò ogas dhis. Tressa, enos—pell dhyworthyn agan dew. In Sowsnek an pellder dewetha-na a via ‘yonder’. Nyns eus meur a ensamplys i’n tavas tradycyonal a’n tressa degrê, saw: merowgh orth an re-ma: Sur me a’n gwel, arlùth rial, enos i’n plain (Bêwnans Meryasek); Me a wel enos dew was (Bêwnans Meryasek); ottenso enos i’n pras ha ganso ost brâs ervys (Bêwnans Meryasek); A welta kyrwas enos, dell vynnas Duw, whar ha dov orth an yêwyow devedhys? (Bêwnans Ke). Yth yw an ger enos cot’hës kefrÿs dhe nos, rag ensampyl: an bos nos dywy a wra saw nyns ujy ow lesky (Origo Mundi). Dre lycklod wàr batron an Sowsnek an ger enos a veu ankevys hag nyns o gesys ma’s omma hag ena, hèn yw geryow rag referrya dhe’n tyller rybof vy ha’n tyller rybos jy. Saw yma whath dyffransow inter ûsadow an Sowsnek ha gîss an Kernowek. In kensa prÿs i’n Sowsnek ny a lever ‘come here’, saw in Kernowek nyns yw an ger omma ûsys in lavarow a’n par-na. An lavar ewn yw deus nes, rag ensampyl: dieskyn ha powes ha dhymmo deus nes (Darn an Chartour); Eva, deus nes, kemer hy rag dhis ny lavaraf gow (Origo Mundi); deus nes dhymm del y’m kyrry rag kêwsel moy yn tefry (Resurrexio Domini) ha deus nes hag assay an pot (Bêwnans Meryasek). Heb mar an ger nes i’n examplys-na yw dhe gelmy gans an ger nessa, rag ensampyl goos nessa ‘car ogas’, ha pows nessa ‘dyllas ogas dhe’n grohen.’ Saw gesowgh ny dewheles dhe’n geryow omma hag ena. Yma ena ow mênya dew dra dhyvers. Onen yw ‘i’n tyller-na’, rag ensampyl in: ev a fias alena dhe Rom hag ena Sîmon Magùs a wrug decêvya an bobel (Tregear); an styr aral yw ‘i’n termyn-na’, rag ensampyl Ena Crist a dhelyfras a bryson Adam hag Eva (Passyon agan Arlùth). In kepar maner yma omma ow styrya ‘i’n tyller-ma’, rag ensampyl: yma omma pobel lowr (Bêwnans Meryasek) ha marow yth ov omma pòr wir gans hy anal boos (Bêwnans Meryasek). Yma omma ow styrya ‘i’n tor’-ma’ inwedh, rag ensampyl Omma me a vynn govyn unn qwestyon dhe vos assoylys (Tregear). In Kernowek ny a yll ûsya omma dhe vênya ‘bys i’n tyller-ma’: rag ensampyl: doro an prysners omma (Passio Christi) ha mollath Duw war ev a wrug hy dry hy obma (Pryce). Saw ny yll ena bos ûsys dhe styrya ‘dhe’n tyller-na’. I’n câss-na an ger ewn yw dy: rag ensampyl: y feu danvenys dhyworth an Tas eleth dy (Passyon Agan Arlùth); gwell yw dyn mos dy uskys (Bêwnans Meryasek). Wàr verr lavarow compes yw leverel devedhys yw ev obma. Saw *ev a wra mos ena yw cabm. An lavar ewn yw ev a wra mos dy.