© 2022 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma Nance ow comendya try ger rag ‘to drive a car’ in Kernowek: gorra, lewyas ha drîvya. Dre vrâs yma gorra ow styrya ‘settya in y dyller’ saw in Origo Mundi an messejer a lever dhe Davyth Mytern ow tùchya an gwelyny sans: my a’s gwith gans meur enour na vo hardh den i’n bys-ma kyn fe mytern pò emprour aga gorra alemma. Dell hevel yma gorra ena ow mênya ‘ladra, kemeres in kerdh.’ Scant nyns ywa an ger compes rag gwythres den orth ros carr tan. An nessa ger yw lewyas saw nyns yw hedna kefys in tyller vëth i’n tavas tradycyonal. Fùndys veu gans Nance wàr lewyth in Kernowek Coth ha lewyador in gerva Pryce. Yma lewyth ha lewyador ow mênya an den wàr scath usy ow kevarwedhya an lester. Saw nyns yw kevarwedhya scath an keth tra avell drîvya carr. Nyns yw gesys ytho ma’s an ger drîvya, ger neb yw kefys dywweyth in Tregear. Hèm yw y kensa exampyl: an promys a wrug Duw promyssya wosa an towl a’gan hendasow Adam ha lydnyath Eva, pàn wrug an Tas aga drîvya in mes a paradîs. Yma an secùnd ow referrya dhe’n omlath jùnys warbydn Martyn Lûther. Tregear a scrif adro dhe Lûther: Ev a veu drîvys wàr dhelergh. I’n dhyw gettesten yth yw drîvya ûsys dhe styrya ‘herdhya dhyragos’. Heb mar hèn yw styr wredhek an ger ‘drive’ in Sowsnek. Kyns ès an carr tan dhe vos desmygys, pàn vedha caryajys whath tednys gans mergh, y fedha an ger ‘drive’ ûsys in Sowsnek rag côwsel adro dhe gontrollya an margh pò an vergh esa ow tedna an caryach. Rag hedna drîvya in Kernowek, growndys wàr ‘to drive’ in Sowsnek, yw an ger perfeth rag trailya an ober a gevarwedhya carr tan. Yma Nance bytegyns ow corra dagyer dewblek dhyrag an ger drîvya rag sygnyfia bos an term drîvya ow longya dhe’n tavas dewedhes yn udnyk. Hèn yw camgemeryans. An ger drîvya in gwir a veu benthygys dhyworth Sowsnek, saw apert yw na veu va benthygys gans Tregear y honen nag in dedhyow Tregear. A pe va benthygys i’n termyn-na, an ger Kernowek a via *dreyvya (poran kepar ha dreifio in Kembrek côwsys). Res yw fatell veu drîvya benthygys dhyworth Sowsnek pàn o an kensa vogalen whath leverys gans î kyns ès ey. An ger drîvya in Kernowek ytho yw kepar ha dew er erel benthygys dhyworth Sowsnek: strîvya ‘to strive’ ha despîtya ‘to insult.’ Scoloryon a wor fatell wrug î dysplêgya dhe ey avell radn a’n chaunj brâs in Sowsnek gelwys Trailva Vrâs an Vogalednow, wharvedhyans a hapnyas orth dallath an pymthegves cansvledhen. Rag hedna ny a yll bos certan fatell veu an geryow strîvya, despîtya ha drîvya benthygys dhyworth Sowsnek kyns ès dallath an pymthegves cansvledhen. Oll an geryow-na ytho a veu benthygys kyns ès gwariow an Ordinalia dhe vos screfys. Nyns usy drîvya ow longya dhe’n Kernowek Dewedhes adar dhe’n Kernowek Cres. I’n tavas dasvewys, pàn wrella nebonen esedha dhyrag an ros in carr tan, compes yw ragon ny dhe leverel ‘Ev a wra drîvya.’