© 2022 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
In Kernowek yma fordhow dhyffrans rag leverel ‘almost’, ha warlergh goslowes orth nebes Kernowegoryon, apert yw dhybm nag yw pùbonen abyl dh’aga ûsya in maner ewn. Gesowgh ny ytho dhe veras orth an fordhow-na an eyl warlergh hy ben. An kensa lavar yw ogas ha. Y fÿdh hedna ûsys rag côwsel adro dhe spâss a dermyn. Rag ensampyl in Creacyon an Bÿs Duw a lever: Nanj yw ogas ha bledhen abàn dhalathas an liv. An secùnd lavar yw ogasty. Yma hedna ow tos dhyworth ogas ha dy. Yma dy ow styrya ‘dhe’n tyller -na.’ Rag hedna yma ogasty ow mênya ‘ogas dhe vos devedhys, ogas dhe vos i’n tyller ewn’. Yth yw ogasty dhe gafos i’n tavas adhewedhes ow tallath gans homylys Tregear. Ot obma nebes examplys: in mar veur ogasty mayth usy pùb den ow frâmya dhodho y honen charyta…kyn fo y vêwnans vyth mar detestabyl dhe Dhuw ha dhe dhen (Tregear); y a wrug corrùptya hag ogasty a stoppyas in bàn an pur blonojeth, an lîvely fenten a vêwnans (Tregear); oll ywa clappys lebmyn ogasty yw dhorth Pedn an Woles dha’n Carrak Loos (Nicholas Boson); ha lebmyn th’eroma ow towla dha weles mar pell itna ogasty avell lies a’n kentrevogyon (Nicholas Boson). Yma form aral a ogasty kefrÿs, hèn yw ogatty, rag ensampyl in lyther Olyver Pender dhe Wella Gwavas hag ev ow côwsel adro dhe’n hern. Pender a scrif: meur râss dha Duw, yth o ogatty oll gwerthys. An tressa fordh rag trailya ‘almost’ yw an ger namna pò namnag. Yma hedna ow tos dhyworth nàm, ger usy ow mênya ‘spot, tabm bian’. Rag hedna styr nam na yw ‘marnas spot bian, marnas tabm munys.’ An secùnd element in namna yw an demygen verbek na pò nag. Dre rêson a hedna, res yw dhe’n verb dos heb let wosa namna. Y hyll hedna bos gwelys i’n examplys-ma: Wharê in mes y trailyas ha’y golon namna dorra (Passyon agan Arlùth); hy holon namna grackya (Passyon agan Arlùth); rag fowt gwest ha goscotter namna verwyn rag anwos (Origo Mundi); rag own namnag ov pòr dhall (Origo Mundi); namna veu ow holon trogh pan welys gorra an guw i’n golon dre’n tenewen (Resurrexio Domini); trig genen, a goweth ker rag namnag yw gordhuwher ha dewedhes (Resurrexio Domini); namnag esof ow merwel orth agas gortos (Resurrexio Domini). Wàr verr lavarow an ger ogasty a yll sevel ganso y honen, saw mars osta porposys dhe ûsya namna/namnag, gwait pùpprës gorra an verb wàr y lergh heb let. Sur oma ogasty why oll dhe wil indelha, pò in ken geryow: namnag oma certan why oll dhe sewya ow hùssul vy.