© 2022 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

An ger corflywans ‘tattoo’ a veu desmygys gans William A. Morris ha dyllys in Istynans an Gerlyver Kernowek, tressa radn i’n vledhen mil naw cans naw deg pymp. Apert yw, dell lever Morris y honen, fatell veu an ger growndys wàr an dhyw element Kernowek corf ha lywans. Yma Gerlyver Oxford ow leverel fatell veu an ger Sowsnek tattoo drës aberth i’n tavas i’n êtegves cansvledhen dhyworth tatau ‘gweskel’ in onen a davosow Polynêsyan a’n Mor Cosel. Yth esa corflywans kebmyn i’n tyleryow-na hag yma an practys kebmyn i’n costys-na whath. I’n dedhyow coth tydn lowr o recêva corflywans rag res o trehy an grohen kyns ès gorra lyw i’n trogh. I’n enesow-ma hag in mesk pobel Ewrop hag Ameryca North nyns o corflywans kebmyn bys in hanter-cans bledhen alebma, marnas in mesk marners hag oberwesyon. Moy êsy ywa i’gan dedhyow-ny gwil corflywa gans jynys arnowyth hag yma corflywans moy kebmyn in mesk an bobel ès bythqweth kyns. In gwir yma parledhow corflywa gwelys in lies le wàr an Brâstir Ewropean, in Breten Veur hag in Wordhen. Marthys ywa inwedh fatell usy benenes yonk in agan dedhyow ny ow cafos corflywansow wàr aga horf. Ny vydna benyn jentyl in dedhyow Vyctorya dysqwedhes corflywans in tyller vëth wàr hy crohen. Y fedha crohen an venyn yonk praisys rag hy gwynder glanyth. Yma corflywans ow tefolya hedna. Y hyll an chaunj brâs bos merkys i’n pyctours a venenes noth i’n paintyansow dhyworth an Renêssans bys in oos Vyctorya. I’n agan dedhyow-ny bytegyns nyns yw anvenowgh gweles mowes in hy ugansow ha corflywans hy bregh ahês pò wàr hy clos dywvron pò hy fâss kyn fe. Heb mar yth yw an qwestyon a gorflywans mater a fassyon, saw gwell yw dhe nebonen, usy ow porposya cafos corflywans wàr y gorf pò wàr hy horf, predery yn town kyns ès kemeres an stap dewetha. Rag cler ywa fatell usy lies huny ow codha in edrek warlergh cafos corflywans. Yma moy ha moy clynygow ow menystra dhe’n edrek-na hag ow profya servys remuvya corflywans. Dell veu leverys kyns, yma an ger Sowsnek ‘tattoo’ ow tos dhyworth ger i’n tavosow Polynêsya. Rag i’n termyn an colonîsans Ewropean y feu corflywans merkys yn arbednyk in mesk poblow an Mor Cosel. Hedhyw i’n jëdh yma pobel Mawry Zêlond Nowyth ow tascafos aga thradycyons a gorflywans, hag yma Mawrys yonk, gwesyon ha benenes, ow cafos corflywans avell tôkyn aga honensys ethnek. Yma benenes in arbednyk ow tysqwedhes corflywans wàr aga gwelvow hag elgeth. Udn bagas nag usy ow sewya an fassyon modern a adoptya corflywans yw an Yêdhewon Ewngryjyk. Yth yw corflywans forbyddys in laha Moyses, rag in Dewtronomy, chaptra nawnjek, ny a red: Ny wrewgh trehy agas kig, may hallowgh why mornya an re marow; ny wrewgh gravya markys warnowgh agas honen: me yw an Arlùth. An udn excepcyon i’n cansvledhen dewetha o an Yêdhewon-na a veu constrînys dhe recêva nyverow kervys wàr aga crohen in Awschwyts hag in campys erel.