© 2022 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yth yw an ger loor ‘moon’ destys dâ i’n textow Kernowek. Rag ensampyl orth dallath Origo Mundi Duw Formyor a lever: I’n peswora gwrÿs perfeth dhe’n bÿs oll golowys glân ha’ga henwyn y a vëdh an howl ha'n loor ha’n stergan. My a’s set a-ugh an gwëdh in cres an ebron avàn, an loor i’n nos, howl i’n jëdh may rollons y golow splann. I’n gwary Creacyon an Bÿs Seth a lever fatell yw Duw serrys dre behosow mab den hag ev dhe vos porposys dhe dhystrôwy an bÿs dre livyow. Seth a wor hedna drefen ev dhe allos redya arwedhyow corfow an nev, an howl, an loor ha’n planettys. Ev a lever:
An planettys eus awartha
ha’n ster inwedh magata
ow poyntya mowns pòr efan,
an howl ha’n loor kekefrÿs
oll warbarth yw convedhys,
dhe’n porpos-na mowns ow tos.
In Bêwnans Meryasek yma ladron owth ania an pow, saw yma tan in mes a’n nev ow codha warnodhans. Yma re ow kemeres own y dhe vos leskys dhe lusow. Nyns yw onen a’n ladron ancombrys bytegyns, rag ev a grës nag yw an tan ma’s an loor ow terevel. Ev a lever:
Ay taw! An jowl dhe’th lesky!
Prag, pandr’yw an fesky
eus genes ha’n terlemmel?
An golowder, me a wor,
nyns yw ev lemen an loor,
pàn ujy ov trehevel.
Myskemerys ywa. Saw ot obma neb tra aral. Ny a wor hedhyw nag usy an loor ow provia golow vëth. In contrary part yma hy ow cafos oll hy golow dhyworth an howl. Kepar dell usy an nor ow mos in hy helghtro adro dhe’n norvÿs, yma hy ow tos inter an nor ha’n howl hag indelha yma hy fâss, neb yw trailys dhe’n bÿs, ow remainya in tewolgow pò owth omdhysqwedhes dhe’n howl. Pàn vo an loor in tewolgow, ny yll hy bos gwelys poynt ha hòn yw an loor nowyth. Pàn vo oll hy enep golowys der an howl, hòn yw an loor leun. Yma an loor ow kemeres dyw seythen rag mos dhyworth loor nowyth (heb radn vëth anedhy dhe weles) bys i’n fâss leunwolowys. Yma hy ena ow kemeres dyw seythen rag mos dhyworth loor leun bys in loor nowyth arta. Yth yw dysplêgyans an loor pùb mis rydnys in peswar qwarter hag y yw gelwys agwedhow an loor, pò in Sowsnek ‘phases of the moon.’ In Sowsnek pàn vo an loor owth hevelly bos owth encressya, an verb ûsys in Sowsnek yw ‘to wax’ ha pàn vo hy owth apperya dysencressya, an verb in Sowsnek yw ‘to wane.’ Nyns eus ger vëth rag an re-na i’n textow Kernowek; res yw ytho benthygya geryow dhyworth Kembrek. Pàn vo an loor owth encressya, ny a yll leverel fatell usy hy ow tevy. Pàn vo hy ow qwadnhe, ny a vydn leverel an loor dhe vos ow lehe.