© 2022 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

John Moore-Brabazon a veu genys in Loundres i’n vledhen mil eth cans eth deg peswar. Ev a gafas y adhyscans in Harrow ha Coljy an Drynjys, Kergraunt, le may studhyas ev jynorieth. Saw ev a asas an ûnyvertya heb gradhegy. Ev o ragresor in airednans, hag in gwir ev a veu an kensa Sows dhe lewyas airen. Ev a jùnyas dhe’n Corf Neyja Rial i’n Gwerryans Brâs ha dewedha an gwerryans avell leftenant coronal ha dendyl an Grows Vreselek. I’n bledhydnyow ugans an ugansves cansvledhen ev a veu dôwysys avell esel seneth rag Party an Mêntenours. Kynth o Moore-Brabazon fest warbydn gwerrya gans Jermany an Natsys, Churchill orth dallath an bledhydnow dew ugans a’n gwrug menyster caryans ha provians airednow. Moore-Brabazon a dheclaryas bytegyns fatell o govenek dhodho y whre Rùssya ha Jermany dystrôwy an eyl y gela. Yth o an opynyon-na kebmyn in mesk an Mentênours i’n dedhyow-na, saw nyns o va plegadow dhe’n governans, rag yth o an Vreten Veur kefrysys gans an Udnyans Sovyet. Rag hedna Moore-Brabazon a gollas y soodh hag y feu va uhelhës dhe Jy an Arlydhy avell Baron Brabazon. In mil naw cans peswar deg try ev a veu appoyntys caderyor a’n kessedhek settys in bàn gans an governans dhe whythra possybyltas rag Dywysyans Airednow Bretednek warlergh an gwerryans. An Sowson i’n termyn-na o ûsys dhe airednow brâs avell tanbelenoryon. An kessedhek a wrug askewera an ragavîsyansow rag airednow brâs a’n sort-na hag a dowlas may fe provies airen rag tremenysy, neb a vydna neyjya inter Breten Veur ha’n Stâtys Udnys. Y feu an kevambos rag byldya an airen grauntys dhe Gowethas Airednow Brystol. Drefen Baron Brabazon dhe vos caderyor a’n bagas a dhesmygyas an ragdres, an airen nowyth a veu henwys An Brabazon. An airen ervirys o cowrek; hy a’s teva eth jyn hag eth kengorror pò ‘propellers’. Ow tùchya brâster yth o an Brabazon mar vrâs avell styf-airednow jùmbô agan dedhyow ny. Yth esa dew leur i’n airen, hag y fia an dremynysy ow viajya warnedhy in condycyons a’n gorlanwes uhelha. Pùb tremynyas a’n jevia spâss adro dhodho kepar ha’n spâss in carr tan bian. Yth esa gwaya-mir wàr an jyn ha barr cocktêls. Kynth o an airen fest brâs, ny ylly hy don ma’s cans tremynyas. Pelha an airen o lent ha ny wre hy gortheby re dhâ dhe’n controllys. An Brabazon a appêryas orth Dysqwedhyans Farnborough i’n vledhen mil naw cans ha hanter-cans hag in Dysqwedhyans Air Parys an nessa bledhen. Saw nyns o airlînen vëth parys dhe berna an Brabazon awos còst uhel a viajya inhy. In mil hanter-cans ha try an governans a dheclaryas fatell vedha an ragdres dewedhys. Y feu an udn ensampyl a’n Brabazon terrys in bàn i’n vledhen-na ha’n metol gwerthys avell relystyon. Dre vrâs yth o an Brabazon mothow brâs. Res yw avowa bytegyns fatell veu meur a daclow deskys pàn esa an jynoryon ow conys wàr an airen, hag meur anodhans a veu a brow in dysplêgyans airednow erel.