© 2022 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Tour Babel yw whedhel i’n unegves chaptra a Jenesys rag styrya prag yma oll dyvers poblow an bÿs ow côwsel tavosow dyffrans. I’n whedhel ny a red nag esa ma’s udn tavas in oll an bÿs. Pobel a dheuth dhe’n Ÿst dhe Shinar. Ena y a wrug cyta hag inhy tour a vryckys— hag yth esa top an tour i’n nevow. Porpos an tour o rag gwil hanow brâs rag an bobel aga honen ha ma na vens y scùllys alês dres fâss an norvÿs. Pàn welas Duw gooth tus an cyta, nyns o va pÿs dâ. Ev a leverys: ‘Mir, udn bobel yns y hag yma dhedhans udn yêth; ha nyns yw hebma ma’s dallath a’n taclow a vydnons y gul. Kebmys a vo ervirys gansans, y a yll y gollenwel. Deun, gwren ny skydnya ha kemysky aga thavas, ma na allo an eyl anodhans ùnderstondya cows y gela.’ Rag hedna, dell lever Jenesys, an Arlùth a’s scùllyas y alês alena wàr vejeth oll an norvÿs hag y a cessyas byldya an cyta. Rag hedna an cyta-na a veu gelwys Babel, drefen an Arlùth dhe gemysky inhy kenyver tavas esa i’n bÿs. Yth yw an hanow Babel ‘Babylon’ kepar i’n sownd dhe’n ger Ebrow rag ‘kemysky’ hag ytho yma Jenesys ow kelmy hanow an cyta gans an fordh may whrug Duw ancombra cowsoryon an bÿs ma na allens ùnderstondya an eyl y gela. Yma an qwestyon whath dhe assoylya: prag yma an Beybel ow côwsel adro dhe dour avell tôkyn a vôstow hautîn mab den? Dre lycklod yma an whedhel ow referrya dhe dherevyans uhel in Babylon, Etemenanki pò ‘templa a fùndacyon an nev ha’n norvÿs.’ Hèn o templa duw Mardùk an Babylonyans. An byldyans o a’n sort aswonys avell zygùrat, ehen a dempla kebmyn lowr i’n dedhyow coth i’n Ÿst Cres. An zygùrat o templa byldys wàr fùndacyon brâs, ha wàr hedna leuryow erel avell stapys, pùbonen anodhans le ès an leur in dadno. Yth esa pobel Mesopotâmya i’n dedhyow coth ow cresy fatell esa aga duwow tregys i’n scrin wàr dop an zygùrat. Yth o Etemenanki onen a’n brâssa a’n templys-na. Nyns yw kefys anodho hedhyw ma’s crellas codhys, saw pàn esa Etemenanki ow sevel, yth o va whe deg whe mêter in uhelder, hèn yw dhe styrya moy ès dew cans ha whêteg troos’hës. Dell hevel yth o whedhel Tour Babel aswonys dâ gans Jowan Boson. Pelha yth esa ev ow cresy fatell esa Gomar, mab cotha Jafet mab Noy, ow côwsel Kernowek. In lyther dhe Wella Gwavas a vis Ebrel mil seyth cans ha deg Boson a scrif: Ow sîra vy a wrug lavarel dhym: Gomar mab Jafet mab Noy a veu an den a wrug clappya Kernowek in termyn Tour Babel dhe vos derevys ha rag hedna ny a yll gweles ha ajwon an tavas Kernowek dhe vos tavas coth, ha trueth yw e dha vos kellys. Nyns yw gwir opynyon Boson ow tùchya cothenep an tavas Kernowek, saw ny oll a yll acordya gans an radn dhewetha a’y dherivas.