© 2022 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Walter Map a veu genys i’n dewdhegves cansvledhen in West a Bow an Sowson, dre lycklod in Conteth Hereford. Ev a lever adro dhodho y honen fatell o va a dhevedhyans Kembrek. Y studhyansow a’n dros dhe Kergynt, dhe Parys, dhe Rom ha dhe lowr a gortys rial ha bryntyn a’n West a Ewrop. Y ober screfys gwelha aswonys yw De Nugis Curialium pò ‘Taclow trufyl rag Lysoryon,’ cùntellyans in Latyn a whedhlow cot adro dhe vaters dyvers. Yma Map ow ry dhyn whedhel a Herla, mytern an Vrythonyon Goth. Udn jëdh stranjer,  nag o uhelha ès appa pò sym, a aperyas dhe Herla. Brâs o y bedn, rudh y varv, yth esa carnow gavar in dadno hag yth esa ev ow marhogeth wàr avar. Yn pryva ev a leverys an geryow-ma dhe’n mytern: ‘Kyn nag oma aswonys dhywgh, yth esoma ow rejoycya in agas nôbylta. Ny wodhowgh why an dra whath, saw yma canasow ow tos dhyworth mytern Frynk dhe offra dhywgh y vyrgh avell gwre’ty.’ An pygmy a dhepartyas ha pàn dhywhelys Herla dh’y gort, ev a recêvas canasow mytern Frynk. Ev a acordyas gans condycyons an canasow ha’n demedhyans a veu restrys. Dëdh an maryach an pygmy ha’y servysy a dheuth ha settya in bàn tent brâs. Y a brovias boos spladn ha dewas marthys rag oll an ôstysy ha nyns o res dhe dus an mytern gwil tra vëth rag an fest. Kyns ès an pygmy ha’y dus dhe dhyberth, ev a leverys dhe Herla fatell vedha res dhodho y sewya nessa bledhen pàn ve restrys y dhemedhyans y honen. Wosa bledhen an pygmy a dheuth ha hùmbrank Herla ha’y gowetha aberth in cav down ha tewl in dadn glegar uhel. Wàr an dyweth y a dheuth dhe rom brâs golowys dre vîlyow a gantolyow. Herla ha’y gowetha a spênas termyn cot ha lowen gans an pygmy. Ena an den bian a ros dhe Herla ky munys hag a gomendyas dhe Herla na wrella ev nag onen vëth a’y gowetha skydnya dhywar y vargh erna vydna an ky lebmel dhywar y dhywvregh wàr an dor. Pàn wrussons dos mes a’n cav bys in aga thir aga honen, radn a’y gowetha a skydnyas ha dystowgh y a veu trailys dhe dhoust. Herla a remainyas wàr geyn margh bytegyns ha metya gans tiak. An mytern a wovydnas orto ow tùchya an vyternes. An tiak a worthebys: ‘A syra, scant ny allama convedhes agas cows, rag me yw Saxon ha why yw Brython. Ny glôwys vy bythqweth hanow an arlodhes-na, saw an dus hen a leverys dhybm fatell o tregys obma lies bledhen alebma mytern gelwys Herla. Ev a entras i’n cav-na ha ny veu va gwelys bythqweth arta.’ Yth esa Herla ow cresy na wrug ev spêna ma’s try dëdh gans an pygmy, saw dell hevelly y feu va moy ès cansvledhen. Herwyth an whedhel, ny wrug an ky bythqweth lebmel dhe’n dor dhyworth ascra Herla hag yma va whath ow qwandra. Heb mar haval yw an whedhel-na dhe’n whedhel Godhalek Oisín in Tír na nÓg pò ‘Pow an Yowynkneth.’