© 2015 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Maria Magdalena a veu henwys rag an tyller may feu hy genys, Magdala, tre wàr an ladn west a Lydn Galyle. Magdala yw hanow Aramaek usy ow styrya ‘tour’ pò ‘dynas.’ I’n awayl ny a red fatell wrug Jesu tôwlel seyth dyowl in mes a Maria Magdalena. In avarr in istory an Gristoneth y feu Maria kelmys gans an behadores a ùntyas Jesu gans oynment precyùs. Nyns eus dùstuny vëth bytegyns fatell o Maria an venyn-na meur hy fegh. Dre rêson a’n keth myskemeryans fygùr kebmyn yw Maria Magdalena in lymnans an osow cres avell hôra repentys. In Wordhen yma colm inter Maria Magdalena ha benenes codhys. I’n pow-ma bys i’n dyweth an cansvledhen dewetha y fedha golghtiow, Magdalen Laundries, rewlys gans lenesow rag mowysy a hevelly dhedhans bos in peryl ‘moral’. Liesgweyth nyns o an peryl ma’s desmygyans an lenesow. An mowysy a veu kemerys aberth in onen a’n golghtiow a’ga anvoth hag a resa lavurya ena heb gober vëth erna wrellens drehedhes whêtek bloodh. An Nacyons Udnys in derivas agensow a gomondyas an peswar ordyr a lenesow esa ow rewlya an golghtiow dhe astevery an mowysy usy whath ow pewa hag a veu prysonys gansans i’n instytûcyons uthyk-ma. Bys i’n tor’-ma ny wrug an ordrys trobla aga honen dhe wortheby na dhe wil tra vëth. Saw gwren ny dewheles dhe Maria hy honen. Kynth yw hy secùnd hanow leverys Magdalene, in Sowsnek y fedha hedna leverys avell Maudlen traweythyow. Ha Magdelen(e), spellys em-â-gê-dê, yw hanow coljiow in Resohen hag in Kergraunt. Yma an leveryans Maudlen dhe gafos in Kernowek kefrës. In gwary Kernowek Resurrexio Domini yma an dhyskyblyon erel ow whelas gwil dhe Tobmas cresy y dhe weles Jesu dasserhys dhyworth an re marow. Maria Magdalena hy honen a lever dhe Tobmas y whrug hy gweles an Arlùth. Ny yll Tobmas hy cresy hag dyscortes lowr mar teu hy ha pêsya gans hy gowegneth, yn medh ev, awos hy roweth, ev a vydn terry hy fedn hy dhyworth hy horf. Ev a lever: Taw ha na gows te venyn me a’th pys; scornya genen lemmyn na wra; stowt awos Castel Maudlen mar qwreth, me a derr dha benn dhis awartha. Apert yw ena Castel Maudlen dhe vos an Kernowek ewn rag Magdala, genesygva Maria Magdalena.