© Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Rehab yw cheryta in Wordhen usy ow provia dyscans, arveth ha gwith rag pobel evredhek. Yma an cheryta ow tendyl mona avell company kenwerthek hag ow terevel arhas dhyworth an bobel kefrës. Warbarth gans an dhyw benfenten-na a vona yma an company ow cafos mona poblek dhyworth an governans. Sùmen an mona-na provies gans an governans dhe Rehab yw adro dhe êth deg mylyon ewro kenyver bledhen. Bys agensow benyn henwys Angela Kerins o kevarwedhores an cheryta. Nyns o pùbonen re lowen ow tùchya gober bledhednek Mêstresyk Kerins. Teyr bledhen alebma y feu leverys y fedha hy gober hy lehës dhyworth dew cans wheg deg mil ewro pùb bledhen bys dew cans try deg ha peder mil ewro. Yma leverys an myns-na dhe vos moy ès dell yw ûsys rag execûtyf i’n dhyberthva vodhek pò voluntary sector. Hag i’n keth termyn yth esa pobel ow lavurya rag Rehab ow pos gordhyllys ha gesys heb arveth dre rêson a galeterow arhansek. Rag hedna y feu Angela Kerins somonys dhyrag kessedhek a dhew jy seneth Wordhen, hèn yw Kessedhek an Acowntys Poblek pò Public Accounts Committee, rag gortheby nebes qwestyons. Pàn omdhysqwedhas hy dhyrag an kessedhek mis Whevrel dhewetha an esely a wrug hy examnya yn sherp. Hy a sconyas yn tien bytegyns leverel pygebmys esa hy ow cafos pùb bledhen avell gober ha pygebmys a ylly hy gwetyas avell pencyon pàn wrella hy omdedna dhyworth hy soodh avell kevarwedhores. Wosa hy dhe apperya dhyrag an kessedhek Mêstresyk Kerins a veu gweskys clâv hag entra i’n clâvjy. Hy a asas hy soodh yn scon warlergh hedna. Lebmyn yma Mêstresyk Kerins ow try oll esely an kessedhek dhyrag an gort rag asteveryans pò compensation. Yma hy ow temondya damajys rag an godhevyans a borthas hy pàn veu hy examnys gans an kessedhek rag an spâss a seyth our. Hy a lever an negys dh’y gwil clâv, 8may feu res dhedhy gasa hy ober, esa y ow qwil dres lies bledhen. Esely an kessedhek a lever y dh’y dyghtya yn ewn. Res yw dhe gevarwedhor company usy ow cafos mona poblek, yn medhans y, dhe vos egerys ow tùchya an fordh may fëdh ûsys an keth mona-na. Hag yma ken tra dhe gonsydra kefrës. Y fëdh whythrans parlamyntek adro dhe’n bancow ow tallath yn scon. Namna wrug an bancow dystrêwy an pow yn tien. Mar teu an gort ha determya nag o an gwir gans Kessedhek Poblek an Acowntys govyn qwestyons sherp orth Mêstresyk Kerins ow tùchya hy gobrow hy, a vÿdh an gwir gans Whythrans an Bancow dhe wovyn an qwestyons ewn orth an re-na a wrug kebmys drog dhe bobel Wordhen?