© 2022 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In narracyon crowsyans Crist in awayl Jowan, ny a red fatell bychyas soudour tenewen Jesu gans y wuw. Goos ha dowr kemyskys a resas in mes. An goly-na in tenewen Jesu warbarth gans an brewyon in y dhêwla hag in y dreys in Kernowek yw gelwys pymwoly Crist. In Resurrexio Domini Crist, ow whelas gwil dhe Maria Magdalena convedhes ev dhe vos dasserhys a’n re marow, a lever dhedhy:


Maria, mir · ow fymwoly!

Crÿs my dhe wir · dhe dhasserhy;

dhis y whòn grâss · rag dha dhesîr

joy in ow gwlas · yfÿdh pòr wir.


In awayl Mathew yth yw leverys fatell esa century ha’y dus ow qwardya Jesus i’n grows. Pàn wharva dorgis, an century ha’y soudoryon a’n gwelas ha’n century a leverys: ‘Res yw fatell o an den-ma Mab Duw’. An soudour i’n awayl Sen Jowan neb a bychyas Jesus yw heb hanow, saw in text apocryfal Awayl Nycodêmus ev yw gelwys Longînùs. Dre lycklod yth yw an hanow-na growndys wàr an ger Grêk lonkhe ‘guw, spera’. I’n tradycyon moyha avarr Longînùs a gafas pùnyshment eternal drefen ev dhe wana Crist i’n grows. In whedhlow derivys i’n bledhydnyow wosa hedna y feu destnans Longînùs ùnderstondys in ken maner. Y fedha leverys yth o Longînùs an keth den avell an century in awayl Mathew neb a leverys Jesus dhe vos Mab Duw. An whedhlow i’n awaylow apocryfal a lever fatell wrug Longînùs cresy in Crist; rag hedna ev yw consydrys sans a’n eglos. Yth yw worshyp dysqwedhys dhe Longînùs in eglosyow an Ÿst hag in mesk Cathologyyon Roman. Whedhel Longînùs a dhysplegyas pelha, hag y fedha derivys fatell o gwadn dewlagas Longînùs, poken ev dhe vos dall yn tien. Pàn resas an dowr ha goos in mes a denewen Crist, herwyth an whedhel, y feu y dhewlagas golhys der an lydn ha’y wolok a veu sawys. Yth yw an wharvedhyans-na derivys in bardhonak Kernowek Passyon agan Arlùth, le mayth yw Longînùs gelwys Longys:


Longys sur an barth dyhow

dhe grows Jesus yth esa.

Dhen marhak worth y hanow

y a erhys may whana.

In corf Jesus caradow

an guw lymm ev a bychya

pòr êwn in dann an asow

dre an golon mayth esa.


An golon yth eth strêt brâs,

dowr ha goos yn kemyskys,

ha ryb an guw a resas

dhe dhêwla neb an gwyskys.

Y wholhas y dhewlagas

gans y eyl lev o gosys.

Dre ras an goos y whelas

Jesus Crist dell o dyghtys.


Pàn welas Longys fatell veu y dhewlagas yaghhës, ev a gemeras edrek brâs. Ev a godhas dhyrag an grows ha pesy gyvyans orth Jesus. Ha dell lever an bardhonak:


Jesus dhodho a avas

pàn welas y edrega.


Yth yw an keth wharvedhyans a sawment dewlagas Longys derivys inwedh i’n gwary Kernowek Passio Christi. A les ywa inwedh fatell veu imach a Sen Longînùs gwrÿs gans Gian Lorenzo Bernini adro dhe’n vledhen mil whe cans try deg rag an pab, an êthves Ùrbînô. Y hyll an imach-na bos gwelys in cres Basylyca Peder Sans in Rom.