© 2022 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yth yw an ger forsâkya ‘to forsake’ kefys whe treveth i’n tavas tradycyonal. Ot obma an examplys-na:

ow sewya neb a vynna, forsâkyens bian ha meur, tiryow, trevow an bÿs-ma (Bêwnans Meryasek)

awos own a dhen i’n bës ny forsâkyn y hanow (Bêwnans Meryasek)

in kerdh gallas, forsâkys y das ha’y vamm, ha ny wòn pyth êth (Bêwnans Meryasek)

gansa ev dhe verwel, eâ ha dhe forsâkya pùb tra oll i’n bÿs rag kerensa Duw (Tregear)

ev a ra deneya ha forsâkya an very gwrioneth, an ordynans a Crist ha’y abosteleth (Tregear)

ha gans an cry a wrug Jowan gwil an ladron a forsâkyas an verchons (Jowan Chy an Hordh)

Drefen y vos ûsys gans auctour Bêwnans Meryasek, gans Tregear ha gans Nicholas Boson, apert yw fatell o forsâkya radn essensek a erva an tavas tradycyonal. I’n Gerlyver Kernewek Kemmyn bytegyns yma George ow comendya dhe gôwsoryon na wrellens ûsya forsâkya, adar gwil devnyth a gasa in y le. Fest anfur yw an gùssul-na. Kyns oll an ger forsâkya yw creffa ès gasa. Den a yll gasa y jy martesen, saw ev a wra forsâkya y wreg ha’y flehes. Hèn yw cler dhyworth an examplys rÿs a-uhon. Secùnd, an ger forsâkya yw ûsys in try thext. Pelha, apert yw fatell veu an ger benthygys dhyworth Sowsnek i’n Osow Cres, hèn yw dhe styrya avell forsâkya adar *forsêkya in Sowsnek modern. Dre lycklod ytho yth esa an ger i’n tavas solabrÿs i’n Kernowek kyns ès an Ordinalia dhe vos screfys. I’n Osow Cres pàn esa an ger forsâkya in ûsyans gans pobel na gôwsy ma’s Kernowek yn udnyk, ny wodhyens bos an ger benthygys dhyworth Sowsnek—rag nyns esens y ow clappya ma’s Kernowek yn udnyk. In agan dedhyow ny an udn rêson dhe dhampnya forsâkya yw drefen an ger dhe vos kemerys dhyworth Sowsnek hag ev dhe vos re haval dhe Sowsnek. Ny worama bytegyns mars yw hedna skyla dâ rag settya an ger adenewen. Avês dhe forsâkya yma nùmber brâs a eryow i’n textow neb a veu benthygys dhyworth Sowsnek, saw mar bell dell worama ny wrug den vëth bythqweth comendya na vêns y ûsys gans côwsoryon arnowyth. Ot obma nebes examplys a verbow Kernowek kemerys dhyworth Sowsnek Cres:

Kernowek ancombra, Sowsnek Cres encombren ‘trobla’

Kernowek apposya, Sowsnek Cres apposen ‘govyn qwestyons orth’

Kernowek aqwytya, Sowsnek Cres aquiten ‘dastylly kendon’

Kernowek assoylya, Sowsnek Cres assoilen ‘styrya’

Kernowek avîsya, Sowsnek Cres avisen ‘merkya, whythra’

Kernowek dystempra, Sowsnek Cres distemperen ‘serry’

Kernowek gordhya, Sowsnek Cres worthien ‘ry onour dhe’

Kernowek shyndya, Sowsnek Cres shenden ‘pystyga’

Kernowek trailya, Sowsnek Cres trillen ‘rollya’.

Me a alsa ry lies ger erel a’n keth sort obma, saw lowr yw an re-na rag an present porpos. Me a grës fatell eus lesson ragon ny oll i’n mater-ma. Mar teun ny ha dampnya geryow yn udnyk drefen y dhe vos re haval dhe Sowsnek, scant ny vëdh lowr a eryow gesys genen. Yma penfentydnyow a’n tavas strothys lowr solabrës. Na esyn ny dhe lymytya gerva an tavas yn udnyk awos agan ragvreusow modern.