© 2022 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Me a garsa hedhyw côwsel a’n geryow Kernowek usy ow referrya dhe vona. Yth esa Nance ow cresy fatell ylly an ger arhans styrya ‘money’, saw camgemerys o va. Yma arhans ow mênya ‘silver’ yn udnyk. ‘Money’ i’n tavas tradycyonal yw mona. Ot obma nebes examplys in mes a’n textow: me a vynn dhe’n benenes ry mona boos ha dewas dhe berna (Bêwnans Meryasek); pronter ev a hevel sur: yma mona gans henna (Bêwnans Meryasek); ny a venja pê an mona sur (John Tonkin). Heb mar an textow a veu screfys pàn esa an mona coth in ûsyans. ‘Penny’ in Kernowek yw dynardeneren, rag ensampyl: tryhans dynar a vona i’n box oll bedhens gwerthys (Passyon agan Arlùth); Sera, agas recken yw pymp dynar (Borde); ev a dal deneren naw (Bêwnans Meryasek). Dewdhek deneren i’n mona coth o udn sols ‘shilling’. In Gerva an Kernowek Coth yth ywa styrys avell pecunia ‘money’ saw yma Lhuyd ow ry sols ‘solidus, a shilling.’ I’n mona coth hanter sols o ‘sixpence’ ha herwyth Borlase hèn o whednar, dhyworth whe dynar. Bys i’n nawnjegves cansvledhen peder deneren in Sowsnek o gelwys ‘groat’. Hèn o grôt in Kernowek: deus nes hag assay an pot: dhyso jy ev a gost grôt kyns dyberth (Bêwnans Meryasek). An ger Kernowek rag ‘pound’ yw punspens: Tan, ot omma dhis deg puns (Bêwnans Meryasek); ev a drail dhyso dha les moy ès mîlyow a bunsow (Creacyon an Bÿs); ry dha stênor deg pens i’n bledhen (Pryce). Yma Ken George ow comendya *peuns rag ‘pound’, saw dell wrug avy dysqwedhes moy ès unweyth, hèn yw myskemerys. In Bêwnans Meryasek yth yw complys an liesek rôsa nôblennow, form udnyk rôsa nôblen. An rôsa nôblen o bath a owr a valew whe sols hag eth dynar. Hanow aral rag an rôsa nôblen o an nôbyl. Yth yw hedna complys in Bêwnans Ke. I’n gwary yma onen a’n senatours ow tespîtya Dûk Borgayn hag ev a lever anodho: Orth ow nôbyl ny spên grôt; dell hevel yma va ena ow styrya y honen dhe vos liesgweyth an valew a’n Dûk. Oll an mona complys genef bys i’n eur-ma yw bathow ‘coins.’ Yth yw bath ‘coin’ ha bathor ‘minter’ gwelys in Gerva an Kernowek Coth. Nyns eus ger vÿth rag mona paper kefys i’n textow in tyller vëth. Nebes Whedhlow Berr yw cùntellyans a whedhlow cot in Kernowek screfys gans Caradar ha dyllys ganso in Cambron i’n vledhen mil naw cans peswar deg seyth. An secùnd whedhel i’n lyver a dherif adro dhe dhen a dorras qwarel fenester boosty, dell hevel dre wall. Pàn wrella perhednek an boosty demondya aqwytyans, an den cablys oll a’y anvoth a re dhodho paper hanter-cans puns. Den an boosty yw contentys hag a re dhe’n den gylty chaunj rag y hanter-cans puns a dhewgans puns ha deg sols. Ha’n den cablus â in kerdh in udn volethy. Ena den coth i’n boosty, warlergh whythra an hanter-cans puns yn tâ, a lever: ‘An mona-ma yw fals.’ Tîtel an whedhel yw An Banknôta.