© 2022 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Rag ‘table’ in Kernowek Nance a gomendyas an ger moos. Hedna yw devedhys dhyworth mensa in Latyn hag yth yw kefys i’n textow Kernowek bys i’n termyn Bêwnans Meryasek. An kensa exampyl yw muis ‘mensa’ in Gerva an Kernowek Coth. Otta an examplys erel. Ha’n gwin esa wàr an voos ev a rannas intredha (Passyon agan Arlùth); a Maria dell wòn dha vos ’berth i’n bÿs-ma onen a’y voos (Resurrexio Domini); ha’m mamm ger in penn an voos (Bêwnans Meryasek). Rag mensa ‘table’ yma Lhuyd ow ry dew er: muis ha bord. Dhyrag muis an Kernowek Coth yma Lhuyd ow corra dagyer rag styrya nag o an ger muis, moos ûsys na felha in y dhedhyow ev. Yth hevel fatell o bord ûsys rag ‘table’ in dedhyow Lhuyd. Y fedha  devnyth gwrÿs a er aral rag ‘table’ i’n whêtegves cansvledhen: In Sacrament an Alter ny a red: henna yw dhe leverel, gas vy dhe remembra fatla oravy yn tâ dha onora, ha pana tabel esta ow sedha. Ytho kyn nag o moos ‘table’ ûsys na felha in Kernowek i’n whêtegves cansvledhen in rag, possybyl o gwil devnyth a dhew er erel: bord ha tabel. In dadn ‘table’ yma Nance in y erlyver Sowsnek-Kernowek a’n vledhen mil naw cans  dew ha hantercans ow ry mos, tabel ha bord. Rag ‘chair’ yth esa Nance kyns oll in y erlyver a’n vledhen mil naw cans try deg peswar ow comendya cader, ha cader yw an ger ûsys i’n tavas dasvêwys. Res yw avowa bytegyns nag yw cader kefys in tyller vÿth i’n textow Kernowek. Nyns yw cader kefys ma’s in henwyn tyleryow hag yth ywa lymytys dhe henwyn carygy, spessly wàr âlsyow. An ger ûsys rag ‘chair’ i’n tavas tradycyonal yw chair, liesek chairys. Yma chair ow mênya ‘soodh, savla’, rag ensampyl: Mar pÿdh den vÿth jùnys dhe jair Peder pò sensys dhe’n stall a Peder, yth yw ow servont vy (Tregear); a nyns ujy Crist ow leverel inwedh fatell wra scrîbys ha Farysys sedha in chair Moyses? (Tregear). Yma va ow mênya ‘cathedra’ pò chair epscop inwedh, rag ensampyl in: Deus omma; eseth i’th chair; gwysk dha dhyllas i’th kerhyn (Bêwnans Meryasek). Saw yma chair whath ow referrya dhe’n dra usy pobel owth esedha warnodho, rag ensampyl: Me a’s orden dhywgh wharê, chairys ha formys plenta; esedhowgh, Syra Jùstys (Passio Christi). Apert yw ytho fatell yw chair an ger êwn rag an tavas dasvêwys ha moy warrantus ès a’n ger cader—nag yw kefys unweyth kyn fe i’n textow. Kyns ès gasa an ger cader bytegyns, dâ via gwil mencyon a neb tra aral adro dhodho. Dell yw ûsys yma -d- inter vogalednow ow chaunjya dhe -s- in Kernowek Cres, rag ensampyl gasa (gadael in Kembrek); wosa (goude in Bretonek); pesy, pysy (pediñ in Bretonek). In Kernowek pàn vo in nessa sylaben bytegyns an chaunj a -d- dhe -s- yw stoppys. Ny a gav lies ger a’n sort-ma, mayth usy an -d- ow remainya heb trailya dhyrag r: ladra, godros, pedry ha peder ‘four’, rag ensampyl. Cader yw onen a’n geryow-na.