(397) Pons Dowr Tay - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Y feu pons dres Dowr Tay in Scotlond dalethys in hâv an vledhen mil eth cans seyth deg onen. Yth o Thomas Bouch an chîff-jynor. Y wharva caleterow gans byldyans an pons. Rag sensy an pons in bàn porposys o an jynoryon dhe settya pyllars a vryck wàr an garrek in dadn an ryver. I’n gwetha prës y feu dyscudhys an dowr dhe vos downha ès dell o cresys wostallath. Rag hedna y feu lehës nùmber an pyllars intendys. Indelha yth esa an pons ow powes wàr jîstys hirha ès dell o porposys kyns. Pelha in le a bowes an pyllars wàr an garrek, y feu kystyow brâs a horn oberys settys wàr wely an ryver ha’n kystyow-na a veu lenwys a goncrît. Pyllars an pons a veu kelmys dhe’n kystyow-na. Pàn o cowlwrÿs an pons y feu va examnys, saw in awel deg yn udnyk. An arolegydhyon a screfas in aga derivas adro dhe sawder an pons y fia gwell examnya an pons in hager-awel ha pàn vedha train ow mos dresto. Y feu an pons egerys dhe’n bobel i’n vledhen mil eth cans seyth deg eth. Nessa bledhen Vyctorya Myternes êth dres an pons ha Thomas Bouch a veu urdhys in marhak. De Sul eth warn ugans Kevardhu a’n vledhen mil êth cans seyth deg naw yth esa hager-awel crev dres ehen ow whetha adreus dhe’n pons. Yth o an gwyns ow môvya peder ugans mildir i’n eur. Orth hanter wosa seyth train tremenysy dhyworth Eilean a’Chroinn (Burntisland) wàr y fordh dhe Dùn Dè a dhalathas y resegva wàr an pons. Yth esa pymp caryach tremenysy hag udn caryach fardellow wàr an train. Warlergh dhe’n train bos nebes mynys wàr an pons, y feu gwrihon gwelys in dadn an rosow. Ena yn sodyn pùb golow wàr an train a dhyfudhas. An train ha meur a’n jîstys in dadno o codhys i’n ryver. Pùbonen wàr an train a veu budhys. Yth esa pymthek person ha tryugans warnodho saw ny veu daskefys ma’s whe corf ha dewgans. Y feu comyssyon settys in bàn dhe whythra an rêsons rag an meschauns. Res o avowa fatell o nebes tus anês solabrÿs awos an pons dhe grena pàn esa trainow ow passya dresto yn uskys. Kyn nag o pùbonen acordys gans brusyans an comyssyon, y feu declarys fatell o dyfyk an pons causys dre wascas an gwyns uhel wàr bons drog-vyldys ha mentênys yn maner dhylowr. Nebes mîsyow warlergh an comyssyon dhe dhylla aga derivas, an chîff-jynor Thomas Bouch a verwys. Nyns o y yêhes bythqweth dâ saw diegrys veu der an preder a gebmys person dhe verwel der y lowsethes y honen. An vledhen warlergh an drog-labm William McGonagall, an lacka prydyth bythqweth a veu, a screfas y lament adro dhe’n wharvedhyans. Trist yw saw yth yw meschauns an pons remembrys dre vrâs dre rêson a graghbrydydhieth McGonagall. I’gan dedhyow nyns yw ponsow byldys wàr byllars; moy kebmyn yw ponsow crog pò ‘suspension bridges’ hag y yw moy saw. Pelha nyns yw horn tôwlys ûsys rag ponsow hedhyw saw concrît crefhës, daffar byldya moy diogel.