© 2022 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Hedhyw me a garsa dasvysytya taclow leverys genef in recordyansow darlêsys solabrÿs. An kensa tra a garsen vy compla yw hebma. I’n recordyans a wrug vy nebes seythednow alebma me a leverys nag o an ger cader ‘chair’ kefys ma’s in henwyn tyleryow, spessly rag referrya dhe garygy wàr âlsyow cost Kernow. Rag hedna me a gomendyas dhe gowsoryon Kernowek rag ‘chair’ dhe wil devnyth a’n ger chair, liesek chairys—ger yw kefys i’n textow ha dyvers styryow dhodho. Yma cader ha chair aga dew ow tos dhyworth cathedra an Latyn rag ‘chair’, kynth yw an ger Grêk in y dhevedhyans gwredhek. Matthi ab Dewi bytegyns remembras dhybm fatell vedha an ger cader kefys kefrÿs i’n radnyeth Sowsnek an West a Gernow gans an styr ‘fram rag troyllya lînen pyskessa warnodho.’ Yth yw canter ha cater formys erel a’n keth ger. Dell hevel bytegyns nyns eus colm vëth inter cader, canter ‘fram’ gans cader ‘chair’. I’n contrary part yma cader ha’y formys erel ow tos dhyworth an ger Frynkek cadre ‘fram’ dhyworth Latyn quadrum ‘pedrak’. Ytho me a leverys an gwiryoneth pàn wrug vy declarya nag o cader ‘chair’ kefys ma’s in henwyn tyller adro dhe’n cost.
Otobma an secùnd poynt. In recordyans darlêsys an seytegves Merth mil ha nawnjek me a gôwsas adro dhe’n geryow Kernowek rag ‘cave.’ Me a leverys ena fatell esa fogo pò fougo, gogo hag ogo kefys in henwyn tyleryow rag ‘cave’. In y lyver ow tùchya henwyn tyleryow Kernowek yma Padel ow compla nebes henwyn usy an element ogo inhans. Yma va ow ry Ogo Dour Cove, Oga Pons, Ogo Mesclen ha Trenugo; pelha ev a re Progo dhyworth Porth Ogo ha Rosogo (leverys Resugga). I’m recordyans me a hyntyas nag o fogo, gogo, oga kefys i’n tyller vëth i’n textow hengovek. Me a leverys inwedh fatell o an ger fow kefys unweyth i’n Passio Christi:
Yth esowgh ow cuthyl ges
a Dhuw hag y sans eglos,
in ow chy a pyjadow
pàn wrewgh agas marhasow
ha fowys dhe ladron plos.
Yth yw fow in Kernowek goos nessa ffau in Kembrek hag ymowns y aga dew ow tos dhyworth fovea ‘pyt bian’ in Latyn. Yma fow ytho ow styrya ‘lair’ kyns è ‘cave’. An ger ûsys rag ‘cave’ i’n textow yw cav, liesek câvyow. Ot obma try exampyl in mes a Bêwnans Meryasek. Kyns oll an Secùnd Dûk a lever:
Bysy yw dhyn bones war:
yma dragon vrâs heb mar
i’n cav omma rybon ny.
Warlergh hedna an kensa Dûk a lever dhe Costentyn:
An dhragon vrâs eus i’n cav
unn den dhe gerdhes a’y sav
ny as na’n latha heb wow.
Pelha kensa chaplen Sen Sylvester a lever:
Down yw an cav may ma hy,
cans pâss dell glôwys ha moy.
Saw me o myskemerys pàn wrug avy declarya nag o an ger ogo kefys i’n tyller vëth i’n textow. In Bêwnans Ke onen a’n canajow a lever dhe Lûcyùs Emprour:
Whath lion goodh in y ogo
dhis a inclyn.
Yth hevel ytho fatell yw ogo kefys unweyth i’n textow hengovek.