© 2022 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
An Gwerryans Brâs a dhalathas in hâv an vledhen mil naw cans peswardhek. Yth esa an dhew denewen ow cresy y fedha an omlath dewedhys kyns Nadelyk. Ajy dhe nebes mîsyow bytegyns y feu ledhys cansow a vîlyow a soudoryon—in batel Dowr Marne ha kensa batel Ypres. An gwerryans in West o methardak pò ‘stalemate’ ha res o dhe’n dhew lu palas cascledhyow ow meras orth y gela in lînen dhyworth an mor in North bys in oryon Pow Swyts. Warbydn mis Kevardhu an vledhen glaw poos o codhys seythen wosa seythen ha’n cascledhyow o glÿb ha yêyn. Pelha nyns o an pow intredhans (an tireth dyberhen) ma’s hager-lîsak. Yn avarr in mis Kevardhu an vledhen-na y feu assay gwrÿs dhe restry astel tedna pò ‘ceasefire’. An pab nowyth, an Pymthegves Benedict, a dhyllas apêl dhe rewlysy Ewrop may whrella an godnys tewel dhe’n lyha dres an termyn may whrug cana an eleth. Ny veu an appêl-na a les vÿth dhe’n jenerals, saw ny wrug an fowt a les dhywortans gwetha an soudoryon gebmyn dhyworth kemeres an mater inter aga dêwla aga honen. Pan esa an Nadelyk ow nessa an glaw heb cessya a jaunjyas dhe rew hag y feu gwelyow batel Pow Flemen cudhys gans ergh scav. Rag moghhe spyrys dâ an soudoryon Jerman, an Emprour, an Secùnd Wilhelm, a dhanvonas sybwëdh dhe’n front. Pàn dheuth an nos dhyrag Nadelyk certan offycers isel in lu an Vreten Veur a ros ordrys dh’aga thus na wrellens tedna, mar ny wre an Jermans tedna ortans kyns. Nos an tressa warn ugans Kevardhu an soudoryon Jerman a dhalathas settya an gwëdh Nadelyk in bàn ryb an cascledhyow hag y ow cana “Stille Nacht” ha hympnys erel. Myttyn dëdh Nadelyk soudoryon Jerman a dherevys in mes a’n cascledhyow hag a swaysyas aga dêwla dhe dhysqwedhes nag êns ervys ha nag o drog vÿth porposys gansans. Yn scon soudoryon Vretednek a jùnyas dhodhans hag y a dhalathas cowethya gansans in udn radna boos, dewas ha cygarygow. Radn a’n Sowson wrug gwary peldroos gans an Jermans. Ny ylly ma’s very nebes a’n soudoryon Vretednek côwsel Jerman saw radn an Jermans a spênas termyn in Pow an Sowson dhyrag an gwerryans hag y a gôwsy Sowsnek. Yth an soudoryon dhyworth Saxony consydrys dhe vos an dus moyha hegar ha moyha lel in mesk an Jermans hag yth hevel fatell wrug an astel tedna sowyny dhe voyha le mayth esa Bretonyon ha Saxons adâl y gela. In kensa mîsyow an gwerryans an Jermans a gemeras meur a dir dhyworth an Francas; rag hedna yth o envy an Francas tro ha’n Jermans re vrâs rag perswâdya an Francas dhe cessya tedna dëdh Nadelyk. Ny wharva astel tedna vÿth wàr front an Ÿst naneyl, rag yth esa an Rùssyans owth ûsya dedhyador Jûlyùs ha nyns o devedhys whath aga Nadelyk y. Kyn na alsa an astel tedna spêdya heb gweres an offycers iselha, an jenerals a gemeras with na wrella tra a’n par-na wharvos arta. Nyns esa ow cortos an soudoryon ma’s ladhva Passchendaele, gass venemys ha pùb scruth aral a’n Gwerryans Brâs.