© 2023 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Y feu William Gwavas genys in Huntingfield Hall, Suffolk, Pow an Sowson, an wheffes Kevardhu mil whe cans seyth deg whe. Y das o gelwys William Gwavas inwedh. Ev a veu prentys atorny dhe Jamys Holt in Lyons Inn. Ena ev a entras i’n Tempel Cres in Loundres. In mis Ebrel an vledhen mil seyth cans seytek ev a gemeras avell gwreg Elysabeth Harris hag a gafas mil ha pymp cans puns gensy. Nebes bledhydnyow dhyrag y varyach ev êth dhe drega in Pensans in Kernow. Pàn wrug ev eryta an posessyon dhyworth y das, yth esa morgajys warnodho. Gwavas kefrÿs a wrug pe an morgaja wàr rectorjy Powl. Gans an rectorjy Gwavas a erytas câss laha in chanslereth. An câss-na o pòr goth rag y talathas i’n vledhen mil whe cans eth deg ow tùchya gwir prownter Powl dhe recêva degevyow wàr an pùscas tîrys in Lulyn hag in Porthenys. An câss a dheuth dhyrag Chy an Arlydhy i’n vledhen mil seyth cans deg warn ugans hag y feu determys warbydn an bùscadoryon. Pàn veu rÿs an vreus Gwavas a screfas gwersyow adro dhe’n chîf dùstuny: Pengelly Brâs. Nyns o Wella Gwavas cowsor genesyk, saw ev a dhescas Kernowek hag a recordyas lies tra i’n tavas. Aswonys o va avell arbenygor. I’n gettesten-ma res yw merkya nag yw Gwavas complys gans Edward Lhuyd in mesk an dus a ros gweres dhodho gans an tavas. Yth eson ny bytegyns in kendon dhe William Gwavas rag dew lyther cot in Kernowek. Pelha Gwavas a recordyas an gwersyow-ma: Why lader gwiador; gwersyow ow tùchya gwary pelyow in Marhas Yow ow tallath Ny oll devedhys wàr tir glas; an desmyk Flogh a veu genys in Mis Merth; ha nebes darnow erel, ina mesk an gùssul-ma warbydn Medhewnep:
Na wrewgh eva re
mès evowgh rag gàs sehes,
ha hedna moy pò le
’vedn gwitha corf in yêhes.
Gwavas a gùntellas lies ger in gerva Gernowek yw gwethys in dornscrîf i’n Lyverjy Bretednek. Apert yw dhyworth y scrîvyow nag o Gwavas mêster wàr an Kernowek, rag yma va ow qwil lies errour. Rag ensampyl in gwersyow adro dhe dhegevyow pùscas Powl, Gwavas a lever dêwdhek tus. Hèn yw cabm hag a dalvia bos dêwdhek den. Hag in scrîven bedh Jamys Jenkyns yma Gwavas ow screfa:
Dadn an men ma deskys brâs den
in tavas Kernowek gyllys.
Scant ny yll hedna bos consydrys Kernowek dâ. Res yw bos teg dhe Gwavas rag ev a wodhya nag o va practycys i’n tavas Kernowek. In onen a’n lytherow complys avàn yma Gwavas ow meneges dhe Oliver Pender nag yw perfeth an Kernowek usy ev ow screfa, hag ev a lever: Nag ov vy whath hanter-den Kernowek dhe screfa do why. Avell gorthyp yma Pender owth assurya Gwavas gans an geryow-ma ev dhe vos gwell ès Lhuyd: Na alja ev clappya na screfa Kernowek pecar ha why. Th’era moy Gembrek pÿth wruga gwil. William Gwavas a verwys i’n vledhen mil seyth cans peswar deg onen hag a veu encledhys in eglos Powl.