(409) Lavarow Ambosek - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Ny wrug Nance na Caradar bythqweth merkya fatell ylly an verb dos ‘to come’ bos ûsys in Kernowek avell verb gweresek pò ‘auxiliary verb.’ Apert yw bytegyns fatell yw dos avell verb gweresek kefys yn fenowgh in lavarow ambosek. Ot obma nebes examplys: mar teu neb gwas ha ladra an gwel dhyworthyn pryva, meth vÿdh oll d’agan ehen (Origo Mundi); mar teu va ha dasserhy, meur a dus a wra cryjy ino y vos Duw a nev (Resurrexio Domini); Mar teun ny ha leverel nag on ny pehadoryon, yth eson ow decêvya agan honen ha’n gwironeth nyns ujy genen (Tregear). Cler yw fatell eus prow brâs ow longya dhe dhevnyth dos avell verb gweresek in lavarow ambosek. Nyns eus otham a gales’he kensa kesson a’n verb warlergh mar pò mara, rag yth yw an d- orth dallath dos chaunjys dhe t- solabrÿs. Ny res ytho mars ûsya mar pò mara warbarth gans an person ewn a dos gans ha martesen hag ena an verbhanow. In Kernowek dasvêwys ytho ny a yll gwil lavarow kepar ha’n re-ma: Mar teu va ha’m pesy dhe dhos ganso, me a wra y sconya; Mar teuma ha’th weles obma arta, me a vydn gelwel an creslu. Bys i’n eur-ma nyns esen ny ma’s ow côwsel adro dhe ambosow egerys, ‘real conditions’ in Sowsnek. Saw y hyll dos bos ûsys inwedh in ambosow degës, pàn nag yw an ambos mar lyckly avell an ambos egerys. Ot obma dew exampyl: Mar teffa den vÿth ha pregoth dhe’n keth sam barbarùs nacyons-ma in aga yêth y aga honen…in by an by y a vynsa stoppya aga scovornow (Tregear); Mar teffa an epscobow ha’n brontyryon i’n termyn passys…desky ha practycya aga dûty ha’ga vocacyons… surly ny wrussa an eglos a Crist dos dhe’n dysonour ha’n dysordyr a welsyn ny (Tregear). Wàr an patron-na ny a yll gwil lavarow a’n par-ma: Mar teffen ha leverel tra mar dhyscortes dhodho, me a vynsa kemeres sham; Mar teffes ha derivas dhybm adermyn, me a alsa parusy gwely ragos haneth. An ambosow gans mar teffa complys a-uhon re beu posytyf. In pana vaner ytho a yllyn ny gwil ambosow degës ha negedhek? An fordh moyha êsy yw dhe wil devnyth a’n lavaren na ve ‘were it not for, had it not been for.’ Ot obma nebes examplys: na ve bos fâls an den-ma ny’n drossen ny bys dhyso (Passyon agan Arlùth); lies omma devorys gans an dhragon ùngrassys na ve ev sur a via (Bêwnans Meryasek); Me a dhodhya gans an ger, na ve ow maw dhe’m lettya (Bêwnans Ke); Surly, ny vynsen cresy an awayl, na ve an catholyk Eglos dhe ry dhymm experyens (Tregear). Y hyller kefrÿs gorra na via in le na ve: rag ensampyl: na via me dhe’th cara, ny vynsen awos neb tra in bàn dha vos exaltys (Creacyon an Bÿs). Ytho ny a yll gwil lavarow a’n par-ma: Na ve Jowan dhe dhos dh’agan rescous, ny a via gesys ryb an fordh dres nos ha na via me dh’y weles gans ow dewlagas ow honen, bythqweth ny vynsen y gresy.