(410) 'To' in Kernowek - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

An ger ûsys rag leverel ‘to’ in Kernowek yw dhe. Ot obma nebes examplys in mes a’n textow: dhe Grist y towns dh’y shyndya ha dh’y dhry dhe’n dor gans meth (Passyon agan Arlùth); Adam, sav in bàn yn clor ha trail dhe gig ha dhe woos (Origo Mundi); Dhe Jesu re bo grassys; dhe bow astranj devedhys me yw omma (Bêwnans Meryasek). Pàn vo dhe jùnys dhe rag’henwyn personek, ny a gav dhymm, dhis, dhodho, dhedhy, dhyn, dhywgh ha dhedha. I’n tavas adhewedhes rag dhedha ‘to them’ ny a gav na formys analogyl dhedhans ha dhodhans. Yma an gorfen -ans kemerys dhyworth an tressa person liesek in verbys. I’n secùnd person liesek ny a wel an form grefhës dhywgh why. Dhia savla sowndys hèn o pòr haval dhe dhe why. Rag hedna i’n tavas adhewedhes ny a gav dhe why rag ‘to you’ hag inwedh dre analogieth dhe vy rag dhymm ha dhe jy rag dhis. Warbarth gans dhe ‘to’ i’n tavas Kernowek ny a gav an rag-ger kebmysk wàr tu, wàr tu ha. Yma hedna ow styrya ‘to, towards.’ Ot obma nebes examplys in mes a’n textow: wàr tu delergh daras idn ty a wra yw port henwys (Origo Mundi); p’yw henna a dheu dhe’n dre war geyn asen hag ebal ow mos wàr tu ha’n templa? (Passio Christi); Wàr tu ha Frynk fystenyn (Bêwnans Ke). Traweythyow yma wàr tu ha ow tysplêgya dhe tro ha, rag ensampyl: Adam, kê in mes a’n wlas tro ha ken pow dhe vêwa (Origo Mundi) cummyas pesaf rag mos alemma tro ha’m pow (Bêwnans Meryasek); fystenowgh tro ha’n daras rag omma ny wrewgh trega (Creacyon an Bÿs). Pàn vo nebonen ow nessa dhe dyller, y hyll bos ûsys an rag-ger completh bys in ‘to, towards’. Ot obma nebes examplys: Gabriel, festyn wharê; bys in Jerùsalem kê (Origo Mundi); scon alemma why a spêd bys in Meneth Olyved (Resurrexio Domini); me a’gas gêd re’m ena pòr uskys bys in Cambron (Bêwnans Meryasek); dhyworth Kewnans an Velyn bys in Tre Mustel Penpol (Bêwnans Ke); kê dhejy bys in Rom gans penn Lûcy (Bêwnans Ke). Pàn vo bys in sewys gans rag’hanow personek bytegyns, res yw chaunjya bys in dhe bys dhe. Ot obma nebes examplys: fystenyn fast bys dhodho (Origo Mundi); mar mynnyth cafos mowes my a’th wor scon bys dhedhy (Origo Mundi); otta an Jesu genef drës bys dhyso yn kelmys (Passio Christi); deun bys dhodho heb lettya (Passio Christi). I’n tavas tradycyonal nyns yw bys dhe kefys dhyrag henwyn tyleryow; i’n câss-na bys in yw ewn. In mis Hedra mil naw cans whe deg whe y feu men cov settys in bàn gans Mebyon Kernow in Lan Ahevran (St Keverne) rag perthy cov a hembrynkysy rebellyans mil peswar cans naw deg seyth. Screfys wàr an men yth yw redys: Rak perthy Cof a Myghal Josef an Gof ha Thomas Flamank Hembrynkysy an Gernowyon a Geskerdhas bys dhe Loundres. Bys dhe Loundres wàr an men yw errour. An text a dalvia redya Bys in Loundres.