© 2023 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Me re beu ow redya agensow lyver nowyth a les brâs dhe Gernowegoryon: dyllans academek a’n text Kernowek Sacrament an Alter. An golegyth yw Daveth Frost ha’n lyver a veu dyllys hevleny gans Gwask Ûnyversyta Keresk avell an kensa kevrol i’n kevres 1000 years of Cornish. Sacrament an Alter yw text usy ow tyghtya an oferen pò Soper an Arlùth dhyworth savla an Gatholygyon Roman. I’n dyllans nowyth-ma ny a gav an text kepar dell ywa i’n dornscrif, text golegys, meur a nôtyansow istorek, nôtyansow ow tùchya an tavas ha gerva. An raglavar yw compassus kefrÿs. Yma text Sacrament an Alter kefys in dornscrif Tregear. Jowan Tregear o vycar Eglos Alun in cres an whêtegves cansvledhen. Kynth yw Sacrament an Alter gelwys yn fenowgh an progeth dewetha in dornscrif Tregear, nyns yw hedna gwir. Nyns yw progeth an text saw catena pò chain a dhevydnow pò ‘quotations’ in Latyn hag ena in Kernowek in mes a dasow coth an eglos. Yma Frost ow tysqwedhes in y raglavar fatell veu an text screfys gans prownter Catholyk gelwys Thomas Stephyn. Ev a veu vycar Eglos Nywlyn in cres an whêtegves cansvledhen. Jowan Tregear ytho o y gentrevak i’n nessa pluw. Yma Frost ow prevy fatell worras Thomas Stephyn Sacrament an Alter warbarth dhyworth Actes and Monuments gans John Foxe, lyver gelwys dell yw ûsys Foxe’s Book of Martyrs. Yma Frost ow tysqwedhes inwedh y whrug Stephyn gwil devnyth a dhyllans mil pymp cans seyth deg whe a lyver Foxe, kyn feu penfenten homylys Tregear screfys moy avarr in rain Maria Tûdor. Maria a veu myternes Catholyk Pow an Sowson dhia an vledhen mil pymp cans pymp deg try bys in mil pymp cans pymp deg eth. Yma an mater ûsys gans Stephyn bytegyns ow pertainya dhe dhedhyow Maria kefrÿs. Pàn veu Maria gwrÿs myternes, hy a dhalathas persecûtya Protestans ha’ga gorra dhe’n mernans. Tredden a’n re ledhys o try epscop a Eglos Pow an Sowson, Hugh Latimer Epscop Kerwrangon, Nicholas Ridley, Epscop Loundres ha Thomas Cranmer arghepscop Kergynt. Kyns oll res veu dhodhans kemeres part in dyspûtyans in Resohen ow tùchya dyscans an oferen. Y a veu jùjys dhe vos heretykys. Dampnys vowns ha leskys yn few in mil pymp cans pymp deg pymp. John Foxe in y lyver adro dhe’n martyrys Protestant a ros oll an scrîvyow ûsys gans an divynys Catholyk i’n dyspûtyans rag determya an try epscop dhe vos gylty a brofessya camgrejyans. Moy ès ugans bledhen moy adhewedhes y feu an darnow-na i’n Latyn gwredhek kemerys gans Thomas Stephyn in mes a lyver Foxe. Ev a addyas trailyans anodhans in Kernowek hag a’s cùntellas avell Sacrament an Alter. Heb mar y feu lies moy ès an try epscop gorrys dhe’n mernans gans Maria Tûdor ha’y governans . I’n gwir in hy rain hy y feu moy ès dew cans ha peswar deg person leskys yn few rag heresy. Marth ywa fatell wrug Thomas Stephyn, prownter Catholyk, ûsya lyver screfys warbydn an Pabydhyon avell penfenten rag y scrîven warbydn an Protestans. Wàr an tenewen aral nyns ywa marth vÿth Maria Myternes dhe dhendyl an les’hanow Maria Wosek.