(416) Elysabet Báthory - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Kyns ès Kensa Gwerryans an Bÿs Ùngary o radn Ÿst a Vonarky Dewek Austrya-Ùngary. I’n monarky-na yth o Franz-Josef emprour in Austrya. In Ùngary nyns o va emprour adar mytern. Warlergh an Gwerryans an Monarky a dorras in bàn ha’n part Ùngarek a veu gwrÿs stât nowyth heb mytern. Pelha Ùngary a gollas meur a’y thiryow, spessly dhe Serbya, dhe Rûmanya ha dhe Slôvakya. In agan dedhyow-ny yma whath moy ès peswar cans ha hanter-cans mil cytysen in Slôvakya ow côwsel Ùngarek avell mabmyêth. Onen a’n Ùngaregoryon gwelha aswonys in istory Slôvakya yw Contes Elysabet Báthory. Ha mars eus hanow brâs dhedhy, nyns yw hy dhe gomendya ragtho. Elysabet o benyn nôbyl. Hy a veu genys i’n vledhen mil pymp cans ha try ugans in ÿst a Ùngary. Pàn nag o hy ma’s pymthek bloodh hy a dhemedhas Ferenc Nádasdy. Teylu hy gour ty a ros dhedhy castel Cachtice in Slôvakya. Hy gour ty a verwys owth omlath warbydn an Tùrkys ha warlergh y vernans whedhlow a dhalathas mos adro fatell esa Elysabet ow moldra benenes yonk. Matthias mytern Ùngary a erhys dhe’n cont palatîn a Ùngary, dhe whythra an whedhlow. An cont a gemeras derivadow dhyworth pobel tregys in côstys Cachtice hag y a alejyas y whrug Contes Elysabet ha’y servysy ladha moy ès whe cans mowes. Elysabet ha peswar a’y servysy a veu dalhednys ha tries. An servysy a veu kefys gylty ha gorrys dhe’n mernans. Kyn feu Elysabet kefys gylty, ny veu hy execûtys, saw y feu hy strothys in hy hastel in Cachtice hag a verwys ena ha hy peswar ha hanter-cans bloodh. Warlergh hy mernans Elysabet Báthory a veu gwrÿs fygùr in lien gweryn Ùngary ha Slôvakya; y fedha leverys fatell wre hy tormentya an mowysy yonk gans najedhow hag ena golhy hy honen in aga goos rag gwetha semlant hy yowynkneth. Dre lycklod yth o Contes Báthory cruel lowr saw ny yll bos cresys an whedhlow derivys adro dhedhy. Teylu Báthory o fest galosek. Hy êwnter o Istvan Báthory, mytern Polayn, Dûk Lythwanya ha Pensevyk Transylvanya. Hy broder o jùj rial in Ùngary; a les inwedh yw fatell esa Matthias mytern Ungary in kendon vrâs dhe deylu Báthory —ha’n gendon a veu gyvys dhodho pàn veu dalhednys Elysabet. Dre lycklod y’s teva teylu Báthory power re vrâs in Ùngary ha lacka whath y o Protestans, hèn yw Calvynydhyon, pàn o Catholyk an mytern. Pelha an kensa accûsacyon warbydn Elysabet a veu gans menyster Lûtheran, ha’n Lûtherans o bagas na gara re an Galvynydhyon. Ny veu an dùstuny warbydn an Gontes kemerys dhyworth persons a welas hy drog-oberow, adar dhyworth re a glôwas anodhans yn udnyk. An dùstuny kefys dhyworth an servysy a veu tednys in mes anodhans dre dormentyans. An tôknys a debel-dyghtyans gwelys wàr gorfow benenes in castel Cachtice a ylly bos causys dre bractycys sawment an oos-na adar dre sadystieth. Dre lycklod nyns o Elysabet inocent yn tien saw yth hevel fatell veu an caskerdh wàr hy fydn in part helghva gwrahas.