© 2023 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yma an ger cammen kefys i’n tavas tradycyonal. Ow tùchya tardhans yma cammen ow sygnyfia ‘step’, saw nyns ywa ûsys ma’s gans temygen negedhek (ny pò na) dhe styrya ‘at all’. Otobma nebes examplys: drog yw genef na vynta cammen trailya yn maner deg (Passio Christi); ow arlodhes sur genef dre dhynargh agas pejys na wrellowgh cammen ladha an profus a Nazare (Passio Christi); me a vynsa y wetha ha ny yllyn cammen vÿth (Passio Christi); den na gresso diogel an keth den-na dhe selwel cammen vÿth na yll wharvos (Resurrexio Domini). Rag ‘pace, step’ avell musur a hirder i’n tavas tradycyonal ny a gav an ger pâss: Mil pâss sur yw an meneth dhyworth an grônd bytyweth (Bêwnans Meryasek); down yw an cav may ma hy, cans pâss dell glôwys ha moy (Bêwnans Meryasek); An mens tireth a barkys hadre ven ow cul tronkys me a ro dhis perpetùal in dyswylyans an trespas, ha moyha pâss te a vÿdh diogel (Bêwnans Ke). Rag ‘pace, step’ avell radn a gerdh mab den an ger yw stap: Syr Turont, agas pajys sur ny vynnons fowt wajys unn stap lavurya adro (Bêwnans Meryasek). I’n gwetha prÿs nyns yw ger vÿth kefys i’n textow tradycyonal rag trailya ‘steps, stairs.’ Rag ‘stair, stairs’ in y erlyver a’n vledhen mil naw cans try deg peswar yma Nance ow comendya an ger gris, liesek grîsys. Hedna a veu benthygys dhyworth Sowsnek Cres grece, grice ‘step, stair’, le mayth yw grece in y dhevedhyans an liesek a gre ‘degree, step.’ Y feu grice benthygys gans Kembrek inwedh, hag yth yw gris ‘stair, step’, liesek grisiau, kebmyn in Kembrek. Res yw poosleva obma bytegyns nag yw gris, grîsys kefys in Kernowek tradycyonal in tyller vÿth. Heb mar yma an ger degrê growndys wàr grê hag yth yw degrê kefys liesgweyth in Kernowek, hag yma examplys kefys in Tregear, in Bêwnans Ke hag in Creacyon an Bÿs. Yma degrê bytegyns ûsys heb excepcyon i’n styr ‘gradation, degree, rank’. Ny yllyr ytho gwil devnyth anodho rag ‘step, stair’. Kyns ès ny dhe asa an ger gris, res yw compla fatell lever Gendall yth o kefys in Sowsnek Kernow an ger tùrn-grîs ‘turn-stairs’, hèn yw ‘spiral staircase.’ Ny worama pandr’o y benfenten rag hedna. Rag ‘stair, stairs’ gwell yw genef gwil devnyth a’n ger in Sowsnek Cres steire ‘stair’; in Kernowek hedna a via stair, stairys. Gendall a lever inwedh fatell vedha an ger stepan ‘step, step-ladder’ kefys in Sowsnek Kernow. Arta ny worama pandr’o y benfenten. Rag ‘ladder’, dell yw ûsys, yma an tavas dasvêwys owth ûsya skeul, skeulyow. Res yw remembra nag yw an ger-na kefys in tyller vÿth in Kernowek tradycyonal. Benthygys veu dhyworth ysgol in Kembrek ha skeul in Bretonek. Y aga dew yw devedhys dhyworth Latyn scala. Hèn yw penfenten kefrÿs an ger Sowsnek ‘scale.’