© 2023 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Dell yw ûsys yth yw naser pò ‘adjective’ chaunjys dhe adverb der an demygen yn. Yth yw an demygen-na sewys gans trailyans kemyskys pàn vo possybyl. Ot obma nebes examplys: dâ ‘good’ saw Pylat yn tâ a wodhya y dhe gêwsel dre envy (Passyon agan Arlùth); brâs ‘great’ saw me re beu pehadores a behas marthys yn frâs (Resurrexio Domini); whar ‘gentle, meek’ saw hag a wodhaffo yn whar dhodho kemmys eus ordnys (Passyon agan Arlùth); lowen ‘happy’ saw my â genes yn lowen hag a dhoro an asen genen ha’n ebal kefrÿs (Passio Christi). Traweythyow yth yw an naser ûsys y honen oll avell adverb, rag ensampyl: me a wrug trespassya crev pàn y’n nehys Duw a nev (Passio Christi); bêwa pell ny ylta jy heb pëth na den vÿth genys (Bêwnans Meryasek). Pàn vo naser i’n gradh comparek ûsys avell adverb, res yw gorra dhe dhyragtho. Ot obma nebes examplys in mes a’n textow: me a gelm fast an losel may hallo pùb oll dhe well dodho ev ry strekesow (Passio Christi); meur ty a far dhe lacka (Bêwnans Meryasek); dhe voy nefra me a’th cas (Bêwnans Meryasek); whath ny goodh dhe dhen vÿth settya byttele, na dhe le regardya an dyscans ha’n fedh a’n keth sam eglos-ma (Tregear); rag henna meur dhe voldha ty a yll gwil dha negys (Creacyon an Bÿs). Pàn vo udn naser i’n gradh comparek ûsys avell adverb ow tos dhyrag naser a’n keth sort, y hyll dhe bos gorrys dhyrag an dhew naser, rag ensampyl: dhe hirha a vo an rol, dhe belha, why a wor oll, hy a vëdh prest ow redya (Bêwnans Meryasek). Saw inwedh y hyll seul bos gorrys dhyrag an kensa naser comparek hag y fÿdh trailyans medhal ow sewya seul: rag ensampyl: Seul voy ancow a wrellowgh, dhe larjya praisys vedhowgh, comendys wosa helma (Bêwnans Meryasek). Mar teun ny ha gorra oll hedna warbarth, nena ny a yll gwil lavarow a’n par-ma: Dhe uhelha a vowgh why owth ascendya an meneth, dhe danowha a vÿdh an air; Dhe voy dywysyk a vy ow studhya, dhe well a wrêta spêdya i’n apposyansow; Seul voy a wrelles garma, dhe le a vÿdh pobel ow coslowes orthys. Hag ot obma an fordh welha dhe drailya dhe Gernowek‘The more the merrier’: Seul voy lies a ven ny, dhe lowenha ny a vÿdh. Ha ‘The bigger the better’ a vÿdh martesen Seul vrâssa, dhe well.