© 2023 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
In Sowsnek ny a lever ‘If he is sick, he will have to stay in bed’, ‘If he is outside, I hope he can’t hear us’ hag ‘If he is here tomorrow, I’ll give him a lift to the office,’ hag yth yw an lavaren verbek ‘if he is’ an keth tra in pùb câss. In Kernowek wàr an tenewen aral res yw ûsya verbow dyffrans i’n try lavar, dell yw apert dhyworth an textow hengovek. Gesowgh ny dhe veras orth nebes examplys. Kensa: examplys a mars yw: Cùscowgh lemmyn mars yw prÿs (Passyon agan Arlùth); Leverowgh dhymmo wharê mars yw den a Galyle (Passio Christi); mars yw mytern Israel, leveryn oll dhodho hayl! (Passio Christi); mars yw dha vodh, graunt an spâss, na dheffo dhymm an mernans (Passio Christi); Mars yw gwir dha lavarow, ny wòn ple hallaf mos (Bêwnans Ke). Secùnd: examplys a mars ujy, maras ujy: maras ujy i’n bys-ma pòr wir, dhe’n mernans ev â hag ev ha kemmys a’n sew (Resurrexio Domini); mars ujy onen vÿth a’n aweylors ow cul mencyon a pain dhe vos dew dhe’n re a wrella y receva ùnwordhy (Tregear); pùb den kepar ha in gweder a yll consydra ha gweles y honen plainly, heb errour vÿth, mars ujy in lel-charyta pò nag usy (Tregear); ma’s ev a wra lel-jùjya ha decernya mars ujy in perfect charyta (Tregear). Tressa: examplys a mara pÿdh, mara pëdh: arlùth dâ mar pÿdh painys, oll y sojeta kyn fowns syns, rag y bain dhe vos grevys (Passyon agan Arlùth); ev re dhendylas yn tâ godhaf mernans i’n bÿs-ma, mara pëdh e lel jùjys (Passio Christi); unweyth mar pÿdh den marow, y spyrys nefra heb wow bÿth ny dheu in y vody (Passio Christi); Lavar an pÿth a vynhy, gans dha golon dhe yêwny ha te a vÿdh ev heb mar, mar pÿdh i’m gallos avy (Bêwnans Ke); Mara pedhaf duwhenhës, me a’m beus gallos i’n bÿs ha’m eskerens a dhrogfar (Bêwnans Ke); mar pÿdh mater vÿth a dyscord, kyn fe in mater a nebes valew, na wrellen ny warlergh agan fantasy agan honen jùjya an dra (Tregear); mar pÿdh hy frût hy tastys, te a vÿdh dampnys ragtha (Creacyon an Bÿs); Rag hedna mar pëdh tra vÿth gwrës dhe gwetha Kernowek, ev a dal bos gen re-na yw genys obma (Nicholas Boson). In dùstuny oll an examplys-na kemerys in mes a’n textow tradycyonal, ny a yll trailya dhe Gernowek compes an lavarow Sowsnek rÿs a-uhon. Mars yw ev clâv, res yw dhodho gortos i’n gwely; Mars usy ev wàr vês, yma govenek dhybm na yll ev agan clôwes ny; Mar pÿdh ev obma myttyn avorow, me a vydn y dhry bys i’n sodhva genef. Y tal dhybm poosleva obma fatell yw an tressa exampyl an lavar usy owth ancombra Sowsnegoryon dhe’n moyha. Rag ensampyl, in whedhel dyllys ugans bledhen alebma, y hyll bos redys an geryow-ma dhyworth den owth offra demedhyans dhe venyn yonk: Mars eus dhyn mab, ev a gyv an bargen tir. Cabm yw hedna. Compes via Mar pÿdh dhyn mab, ev a gyv an bargen tir.