© 2023 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yma lies esel i’n bÿs a deylu an gath: lion, tîger, lewpart, pûma, jagwar, panther ha’n chytrak pò ‘cheetah’. Yma cath wyls in Ewrop (Felis sylvestris), saw dre rêson an gath-na dhe vos cresys dhe ladha certan vestas chy, yth esa hy nyverow ow lehe. Hag yth yw hy ytho traweythys in meur a Vrâstir Ewrop. Yma an gath wyls kefys in tyleryow in Scotlond ha dell hevel yma an ehen owth encressya hag ow lêsa tro ha’n soth. Y hyll an gath wyls parya gans cathas chy neb yw gyllys gwyls ha hèn yw peryl dhe bureth an ehen. Yth yw an gath wyls pòr haval dhe’n gath chy ow tùchya semlant; saw dell hevel yma arbenygoryon ow cresy nag yw an gath wyls henvabm an gath chy. I’n contrary part an gath chy yw derevys dhyworth an gath wyls Afrycan (Felis lybica). Yth hevel fatell veu an gath wyls wharhës kyns oll i’n Ÿst Cres hag in Ejyp. Yth o cathas estêmys brâs in Ejyp. In gwir an Ejyptyans a’s teva duwes henwys Bast, dysqwedhys pùpprÿs avell cath. Pelha in Ejyp coth nyns o lafyl ladha cath. Nyns yw re gales ùnderstondya prag y whre cathas recêva kebmyn onour in Ejyp. Yma Dowr Nîl ow resek dre Ejyp hag ytho yth yw an pow pòr froothus. Ny a wor dhyworth whedhel Jôsef i’n Testament Coth fatell esa ÿs in Ejyp pàn esa nown brâs in powyow erel. Mars esa gwaneth in Ejyp, res o hy hùntell ha’y gwitha in ÿsleow. Hedna a vydna dynya logos ha logos brâs. Cathas a vedha a les rag controllya an plâgys bian-na. In Ewrop i’n Osow Cres wàr an tenewen aral, y fedha cathas hâtys. Y a vedha kelmys gans gwrahas. In gwir an bobel a gresy fatell ylly an Jowl chaunjya y honen dhe gath dhu. Yth esa pobel ow cresy fatell wre an eretykys, rag ensampyl, an Waldensyans ha’n Cathars, cowethya gans cathas. Y fedha leverys fatell gafas an Cathars aga hanow dhyworth an ger ‘cath’. Pàn veu Marhogyon an Templa (“the Knights Templar”) drÿs dhyrag an gort i’n peswardhegves cansvledhen avarr, y a veu acûsys a alowa cathas dhe gemeres radn in aga servyssyow ha fatell wre an Varhogyon offra pejadow dhodhans. Dre rêson a hedna nyns esa mar lies cath in Ewrop i’n dedhyow-na ha’n logas brâs a encressyas in nùmber. Hèn o onen a’n rêsons in cres an peswardhegves cansvledhen rag an Mernans Du.