© 2023 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Porsegyon pò ‘Marsupials’ yw esely a is-rencas bronegyon pò ‘mammals.’ An radn vrâssa a vronegyon i’n bÿs, mab den comprehendys, yw brehegyon pò ‘placentals.’ I’n câss an porsegyon yth yw an best yonk genys in stap avarr a’y dhysplêgyans, pàn nag yw an flogh nowythgenys ma’s nebes centymêter ahës. Yma va ow cramyas corf y vabm in bàn ow clena worth hy felour tew hag aberth in pors ‘marsupium’ pò ‘pouch’ wàr hy thorr. Ajy dhe’n pors yma tethednow hag yma an best bian ow kelmy y honen dhe hodna hadre vo va ow maga y honen. An porsek gwelha aswonys yw an cangarou ha’n best yonk yw gelwys ‘joey’ in Sowsnek. In câss an cangarou y hyll peswar flogh yonk bos owth omvaga i’n pors warbarth. Yma an ‘joey’ ow remainya cans ha naw deg jorna i’n pors, erna vo va brâs lowr dhe dhos in mes. Saw y whra an cangarou bian dewheles dhe’n pors yn fenowgh. Adro dhe dhew cans try deg ha pymp dëdh yma va ow tos in mes rag an dewetha prÿs. In mesk an porsegyon erel ny a yll reckna: an walaby, goos nessa an cangarou; an wombat pò brogh porsek, best bian peswartrosek tew; an coâla, best loos y lyw usy tregys in gwëdh hag usy ow tebry dêlyow ewcalyptùs; an bandycût; best bian nebes haval dhe logosen vrâs; ev a’n jeves sron hir hag yma ev ow palas i’n dor rag treghvilas ha preves. Porsek aral yw an jyowl Tasmânyan, nag yw kefys in agan dedhyow ny ma’s in Tasmânya, saw an best re beu drÿs ajy agensow dhe Kembra Soth Nowyth. Yth ywa kigdebror hag i’n gwir yth ywa an porsek kigdebrus brâssa oll. Yth ywa mar vrâs avell ky ha du yw y belour. Yth esa porsek kigdebrus aral in Austrâlya gelwys an tîger Tasmânyan, kynth o va kefys dres oll Austrâlya i’n dedhyow coth. An tîger Tasmânyan a verwys in mes in Austrâlya moy ès dyw vil vledhen alebma, dell hevel, pàn dhros genesygyon Australya pò ‘an Aborigines’ an ky (dyngô) aberth i’n brâstir. An tîger Tasmânyan a dhuryas bytegyns in Tasmânya bys in bledhydnow deg wàrn ugans an ugansves cansvledhen. Oll an porsegyon complys bys lebmyn yw tregys in Austrâlya pò i’n enesow ogas dhe gôst Austrâlya. Saw yma porsegyon kefys in Ameryca Soth kefrÿs ha lies anodhas yw opossùmys. Yma opossùmys kefys in Ameryca North inwedh hag yma arbenygoryon ow soposya fatell lêsas an opossùmys dhyworth Ameryca Soth dhe Ameryca North, pàn wrug an dhew vrâstir jùnya warbarth in kenistory an norvÿs. I’n kenistory inwedh yth esa brâstir hûjes brâs wàr an planet-ma ow consystya a Ameryca Soth, Afryca, Antarctek hag Austrâlya; an brâstir-na yw aswonys gans sciensydhyon avell Gondwanalond. Yma radn anodhans ow tesmygy fatell dhalathas porsegyon in Ameryca Soth; ha fatell wrussons spredya dhyworth an tyller gwredhek-na bys in Austrâlya dres an pons tir, hèn yw Antarctek, o pelha dhe’n north i’n oos-na. Ytho, kynth apperyas porsegyon kyns oll in Ameryca Soth, hedhyw yma an radn vrâssa anodhans in Austrâlya. Heb mar nyns usy kenyver onen owth acordya gans an dhamcanieth-na.