© 2023 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
In Jenesys ny a red fatell wrug an Serpont tùlla Adam ha Eva. Y a dhebras frût an wedhen forbyddys ha Duw a’s tôwlas in mes a baradîs. Nyns usy Jenesys ow referrya dhe’n Serpont ma’s avell Serpont yn udnyk. I’n dewdhegves chaptra a Revelacyon bytegyns ny a red a werryans i’n nev inter eleth Duw wàr an eyl tu ha’n Dhragon wàr y gela. An scryptour a lever: Myhâl ha’y eleth a werryas warbydn an dhragon. An dhragon ha’y eleth a wrug omlath. Saw ny wrussons y overcùmya, naneyl ny veu aga thyller kefys in nev namoy. Ha’n dhragon vrâs a veu tôwlys in mes, an hager-brÿv coth, henwys an tebel-el ha Satnas, hedna usy ow tecêvya oll an bÿs. Ev a veu tôwlys in mes dhe’n dor, ha’y eleth a veu tôwlys in mes warbarth ganso. Pelha in lyver an profet Esay yth yw screfys: Ass osta codhys dhia nev, a Verlewen, a vab an Dëdhtardh! Ass osta trehys dhe’n dor, te, neb a dhystrôwas an nacyons! Te a leverys i’th colon, ‘Me a vydn ascendya bys in nev; a-ugh sterednow Duw me a vydn settya ow thron avàn; me a vydn esedha in mownt an cùntellyans in north pelha dhyworthyn; me a vydn mos moy uhel ès an cloudys i’n ebron; me a vydn gul ow honen kepar ha’n Duw Uhelha.’ Yma Berlewen ena ow mênya Steren an Myttyn, hèn yw Vênus. Saw Steren an Myttyn in Latyn yw gelwys ‘Lûcifer.’ Mar teun ny ha gorra warbarth an try thyller-na i’n Beybel ny a gav an narracyon usy ow sewya: Duw a formyas an nev ha’n nor, hag a wrug an eleth ha’ga settya in nev avell servysy dhodho. An el spladnha o Lûcyfer saw ev a gonsydras y honen uhelha ès Duw. Rag hedna ev a rebellyas. Heb mar ny ylly ev prevailya warbydn Duw ha Duw a’n towlas gans y gowetha in mes a’n nev dhe’n dor bys i’n iffarn. Ena ny a yll soposya fatell formyas Duw mab den rag lenwel tyller Lûcyfer. Rag ewn envy Lûcyfer êth dhe baradîs mayth o tregys an den ha’n venyn hag a spêdyas dh’aga ferswâdya dhe dhysobeya arhadow Duw ha dhe dhebry frût an wedhen dhyfednys. Dell lever Tregear: ny wrug [Lûcyfer] cessya dre creft ha dre questonow adro dhe Êva…bys may whrug gwil dhedhy terry comondment an Tas. Pàn wrussons y dysobeya Duw, y a veu sojeta dhe vernans ha Duw a’s herdhyas in mes a baradîs. Oll an whedhel-na yw dysqwedhys dhyn in maner vew i’n gwary Kernowek Creacyon an Bÿs. Saw yma udn poynt nowyth i’n gwary nag yw kefys i’n Beybel. Wosa bos formys gans Duw, yma Lûcyfer ow rebellya hag ev yw tôwlys in mes a’n nev. Lûcyfer a garsa temptya Adam ha’y wreg dhe derry comondment Duw, saw mar hager yw y semlant, yma va ow perthy own na vÿdh ev recêvys gansans. Belsebùk, y goweth, a gomend dhodho entra i’n Serpont, rag yth yw hy pòr sêmly avell vyrjyn deg. Lûcyfer a wra indelha; tùllys yw mab den ganso ha paradîs yw kellys.