© 2023 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
In tradycyons gweryn Kernow yth o an scovarnak a les brâs, rag yth esa an bobel ow cresy y whre certan benenes chaunjya aga form dhe scovarnogas ha fatell ylly scovarnogas gornaturek aperya avell tarosvan dhe dus fals aga holon. Yma whedhel fest coynt gans Robert Hunt in y lyver ow tùchya crejyansow an Gernowyon i’n termyn eus passys. Yth yw an whedhel kepar dell usy ow sewya: Yth esa tiak fest rych hag ev a wrug arveth den yonk sêmly dhe wonys ragtho wàr y vargen tir. Yth o an den yonk tregys in chy brâs wàr an bargen tir esa ow longya dhe’n tiak. Wosa termyn mowes yonk a veu arvedhys dhe servya avell lethvyrgh in lêty an den yonk. An vowes o pòr deg ha fest dywysyk, kynth o hy heb dyscans vÿth. Saw nyns o re bell erna wrug an lethvyrgh ha’n den yonk codha in kerensa dhown gans y gela. Pelha aga herensa a dremenas oryon an dothter hag y a gùscas warbarth. Nyns o kerens an den yonk pÿs dâ gans carores aga mab, drefen hy dhe vos a rencas iselha agesso ev, hag y a whelas y gemeres dhyworty dre bresentya dhodho cowethes moy wordhy. Wàr an dyweth y a spêdyas dhe gafos ragtho benyn uhelha hy stât ha’n den yonk ha’n venyn nowyth a veu demedhys. I’n gwetha prÿs y feu apert fatell o an lethvyrgh gans flogh solabrÿs. Udn vyttyn y feu dyscudhys in pras adro dhe’n bargen tir an corf a flogh nowyth-genys. Cler o fatell veu tegys an flogh truan. Heb mar yth esa an bobel ow trogdyby an vowes yonk. Hy a veu drÿs dhyrag an gort ha hy acûsys a ladha hy flogh hy honen. An den yonk ha’y gerens a brovias meur a’n dùstuny wàr hy fydn. An vowes a veu kefys cablus hag a veu cregys. Wosa hedna pùptra wàr an bargen tir a fyllys, ha ny wrug tra vÿth soweny rag an den yonk. Ev a forsâkyas an bargen tir ha mos dhe gen tyller. Ny wrug tra vÿth soweny dhodho ena naneyl, saw ev a dhalathas eva yn poos rag budhy y dristans cudh. Ev a vedha gwelys wàr an fordh yn fenowgh—dres nos moy ès in dadn wolow an howl. Pelha pynag oll dyller may whre va mos wàr y vargh, yth esa scovarnak wydn worth y folya poken orth y vetya i’n fordh. Y feu an scovarnak wydn gwelys dëdh wosa dëdh ow ponya in dadn dreys y vargh. An margh a wre kemeres scruth ha ponya in kerdh may halla ev diank dhyworth an tarosvan uthyk. Udn vyttyn trouvys veu corf an den yonk codhys aberth in bal sqwattys. Dell hevelly, y feu an margh kefys ow pory ryb an whel kefrÿs, hag apert o fatell gemeras an margh euth. An gentrevogyon ytho a wodhya yn tâ pandra wharva. An scovarnak wydn a aperyas an nos kyns dhe’n den yonk ha dh’y vargh. An margh a veu kebmys ownek’hës may whrug ev tôwlel y varhak aberth i’n pyt hag indelha y ladha.