© 2023 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
I’n dedhyow coth y fedha derivys lies whedhel in Kernow ow tùchya gorholyon ha marners gornaturek. Ot obma dew exampyl: I’n gwaynten an vledhen êtek whe deg dew in Porth Ia lewyor (hèn o den a wre golyas in mes wàr an mor dhe wil gweres dhe worholyon in peryl) a dhescas dres nos fatell o terrys slûp gelwys an Sally ogas dhe Porth Ia ha hy wàr hy fordh dhe Heyl. An lewyor a dhrehedhas tavern an Carow Gwydn ha gweles nebonen ow sevel wàr an cay: an lewyor a dhynerhys an stranjer. Ny wrug an stranjer y wortheby. An lewyor a’n cablas a’y dhyscortesy saw whath ny leverys an stranjer ger vÿth. An den ùncoth a drailyas y hager-fâss orth an lewyor hag egery y anow. An lewyor a welas pana uthyk o y vejeth rudh gans goubman ha scobmow predn in y vlew hag in y varv. An lewyor a gerdhas in rag bys in chy y gowetha, hag a glôwas an stranjer ow kerdhes adhelergh dhodho. Yth esa dowr ow lagya in eskyjyow an stranjer gans kenyver stap. An lewyor a gemeras own ha dallath ponya bys i’n chy. Ev a veras wàr dhelergh hag ev ow ponya ha gweles an stranjer ow sevel i’n tyller may whrug ev y asa. Saw pàn dhrehedhas ev an chy ha meras adro, otta an stranjer a’y sav poran adhelergh dhodho. An lewyor ha’y gowetha êth in mes dhe’n Sally ha’y dry dhe’n tir. Pàn dheuth an lewyor dhe’n tir yth esa ev owth omsensy clâv. Ev a gerdhas bys in y jy y honen saw ev a gemeras peswar our dhe gerdhes peder mildir; pelha res veu dhodho growedha wàr an fordh. Y vreder a’n kemeras in bàn ha’y dhry tre. Try dëdh wosa hedna oll y vlew a godhas dhywarnodho ha’y bedn o blogh yn tien. Ha’n blew pàn devys arta yth o va gwydn wostallath. An lewyor a remainyas clâv dres whe mis hag a spênas sùmen vrâs wàr vedhygyon ha medhegneth. Saw dewdhek mis warlergh an wharvedhyans, y feu y vlew mar dew ha mar dewl avell kyns. Otta ken whedhel: i’n vledhen êtek try deg eth, y feu derivys fatell esa gorhal kenwerth, an Neptune, in peryl dhe’n west a Porth Ia. Moy ès udn scath a veu launchys rag mos dh’aga gweres. Oll felshyp an scath a dowlas dhywarnodhans aga mantel may hallens rêvya dhe well. Y a dheuth ryb an lester ha’n marner orth an lew a grias: “Bedhowgh parys dhe grambla warnedhy.’ An revador arâg a savas in bàn, y vantel wàr y vregh hag ev parys dhe lebmel i’n gorhal. Yth o an lester mar ogas may hallens gweles an dus warnedhy. An revador a whelas dalhedna tenewen an gorhal saw ny wrug y dhêwla tùchya tra vÿth. Y goweth a’n sêsyas hag i’n gwelha prÿs ev a godhas aberth i’n scath kyns ès i’n mor. An gorhal gans hy golowys ha’y felshyp a vanyshyas. Ternos y a glôwas fatell veu terrys an Neptune gans oll hy felshyp ha pùbonen warnedhy dhe vos budhys.