© 2023 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn. Open in two separate windows to see the text and listen at the same time.
Pùbonen re glôwas an gân Nadelyk ‘Good King Wenceslas looked out,’ saw pyw o Wenceslas? Ha prag y feu cân screfys adro dhodho? Wenceslas o genys in vledhen agan Arlùth naw cans seyth in Bohêm, radn hedhyw a’n Poblegeth Check. Wenceslas pò Wenceslaus yw form Latyn a hanow Slavek gwrÿs a dhyw wredhen veli ‘brâs’ ha slava ‘glory’. An form Check in agan dedhyow-ny yw Vlácav. Wenceslas o mab Vratyslaws, dûk Bohêm. Nyns o ev na Wenceslas, y vab, myterneth Bohêm bythqweth. Ny vowns y ma’s dûkys. Sîra wydn Wenceslas a veu trailys dhe’n fëdh Gristyon gans Cyryl ha Methodyùs, abosteleth an Slavysy. Mabm goth Wenceslas o Lùdmyla ha hy o Cristyones inwedh. Pàn o Wenceslas adro dhe dredhek bloodh, y das, an dûk, a verwys ha’y vabm goth a veu gwrÿs rêwlyores Bohêm. Mabm Wenceslas a berthy avy a’n gallos a’s teva Lùdmyla ha hy a wrug arveth tus dh’y ladha. Warlergh denladh Lùdmyla, mabm Wenceslas a gemeras tyller Lûdmyla avell rêwlyores Bohêm. Mabm Wenceslas o gelwys Drohomira. Avell rêwlyores an pow hy a dhalathas compressa Cristonyon. Ny dhuryas power Drohomira re bell bytegyns. Pàn o Wenceslas êtek bloodh an vryntynyon Gristyon, esa whath tregys in Bohêm, a dherevys warbydn Drohomira; hy gallos avell rêwlyores a veu kemerys dhyworty ha hy a veu exîlys. Gans scodhyans an dus nôbyl Wenceslas a gemeras governans Bohêm warnodho y honen. Ev a redûcyas power an vryntynyon vunys hag a wrug devnyth a’n Gristoneth rag encressya gallos an stât. Yn avarr i’n vledhen naw dew naw Henry mytern an Frankys hag Arnùlf dûk Bavarya a assaultyas Prag. Nyns yw certan an rêson rag an assault warbydn Bohêm, saw Wenceslas a veu constrînys dhe dallath arta trubyt dhe’n dhew Jerman-na. I’n vledhen naw try pymp bagas a dus nôbyl a gesplottyas warbydn Wenceslas gans Boleslav, y vroder yonk. Y a elwys Wenceslas dhe fest hag ena y ladha. Mernans Wenceslas yw aswonys avell troboynt in istory Bohêm. Kynth o Boleslav drogwas cruel, ev o rêwlyor galosek; ev a savas yn crev warbydn an Jermans hag encressya tiryow Bohêm. Drefen Wenceslas dhe vos Cristyon, ev a veu consydrys martyr. Yn scon warlergh mernans Wenceslas devôcyon a devys in bàn dhodho in Bohêm hag in Pow an Sowson. Kyn nag o Wenceslas ma’s dûk, termyn cot warlergh y vernans Otto, an Emprour Sans Roman, a wrug grauntya dhodho an tîtel a vytern. Ajy dhe nebes bledhydnyow, y fedha peswar bewscrif a Wenceslas ow mos adro. An textow-na o a valew brâs in Osow Cres rag shâpya tybyans an rex justus pò mytern ewnhensek, ha dhe styrya fatell o gallos an monark growndys wàr y sansoleth kefrÿs ha war y nerth avell pryns. Yth o lies whedhel derivys adro dhe Wenceslas ha’y helsys brâs dhe’n vohosogyon. In cres an nawnjegves cansvledhen John Mason Neale, screfor hympnys Sowsnek, a dhyllas y gân ‘Good King Wenceslas looked out on the feast of Steven’ hag ev a’n settyas dhe velody dhyworth an tredhegves cansvledhen. Drefen Degol Stefan dhe vos an whefes dëdh warn ugans a vis Keverdhu, yth yw can Neale clôwys yn fenowgh hedhyw avell carol Nadelyk.