(459) 'Gans' ha 'Dhe' - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

‘With me’ in Kernowek yw genef. Yth yw f an dewetha kesson i’n ger-na, adar v. Ny a wor hedna dhyworth an lavar hanter an elath genaffa in Creacyon an Bÿs, le mayth yw genaffa gwrÿs a genef ha va, vy ‘me’. Lluyd ha Jenner a scrif genev. Lhuyd a veu ledys astray dre gennyf in Kembrek gans [v] orth dyweth an ger. Jenner dell hevel a veu decêvys dre genevy spellyans kebmyn in Bêwnans Meryasek. In Kernowek Cres yth yw f kellys yn fenowgh orth dyweth sylaben dhyboslef pò ‘unstressed syllable’. In Bêwnans Meryasek ytho genevy yw rag gene’ ha vy. Ny veu *genev bythqweth i’n tavas. Indelma inwedh kewar yw orthyf adar orthyv, dhyworthyf adar dhyworthyv, ahanaf adar ahanav, rybof adar rybov, hag erel. Warbarth gans genef yma genes, genen ha genowgh. Cowsoryon a’n tavas dewedhes a bredery fatell o gen- form wredhek, a’n rag-ger; ytho y a wre ûsya gen in le gans. Otobma nebes examplys: Pandra venta gwil gen an ost a’n chy? (Jowan Chy an Hordh); hy a consylyas gen neb un vanagh era i’n tre (Jowan Chy an Hordh); dort an Romans meskys gen an Brytes (Nicholas Boson); Herod, pà’ wrug e gweles fatell o ges gwrës anodho gen an tus fur, yw engrys (Rowe); rag indelma mayth ywa screfys gen an profet (Rowe); gen oll gàs crevder (Gwavas). Wostallath in Kernowek Cres ‘with him’ o ganso, ha ‘with them’ o gansa. Saw warbydn termyn Bêwnans Meryasek nyns o dyffrans vÿth dhe glowes inter o hag a i’n dhew er. Rag goheles kebmysk, an tressa person liesek a recêvas an dyweth verbek -ans. Indelma y kefyr ganso, gansa ‘with him’ saw gansans ‘with them’, rag ensampyl in ny an jevyth agan reward gansans y (Tregear); rag talkya a’n mater-ma in aga mesk y ha gansans y, ev a ve drîvys wàr dhelergh (Tregear). Ena -ans a spredys dhe eryow erel, rag ensampyl: dhywortans, warnodhans, ragthans, rypthans. ‘To you’ in Kernowek Cres yw dhywgh why. Saw gans an pooslev wàr an secùnd sylaben yma hedna ow sowndya pòr haval dhe dhe ‘to’ ha why ‘you’, ha ny a gav dhe why liesgweyth i’n textow Kernowek. Pelha yth esa dhyn ny ‘to us’ ow sowndya kepar ha dhe ‘to’ ha ny ‘we, us’. Rag hedna dhe ny yw pòr gebmyn i’n textow. In Kernowek dewedhes spellyans a’n sort-na a spredys hag y kefyr dhe vy in sted a dhymmo vy ha dhe jy in sted a dhyso jy. Ot obma nebes examplys: y promysyas dhe vy y fedhen dhe well nefra (Creacyon an Bÿs); ha dhe vy ev a ornas alena aga châcya (Creacyon an Bÿs); an venyn a wrusta ry dhe vy, hy a ros dhe vy dhor’ an wethen (Rowe); ma dhe vy trial in cort an Vyternes (Dornscrif Bilbao); Nyns yw dhe jy mar gebmyn avell dhe vy; ny gefys vy ma’s an exampyl-ma: me a laver dhe jy, yth yw lemmyn corf agan Arlùth Jesus Crist (Sacrement an Alter). Kyn wodhya Nance adro dhe gansans hag erel, ha dhe vy, hag erel, ev a gomendya pùpprÿs heb aga ûsya.