© 2026 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
I’n dedhyow coth gwragh ‘witch’ o benyn neb o cresys dhe vos ow cowethya gans an Jowl hag a ylly gwil drog dh’y hentrevogyon dre bystry. Gwrahas yn fenowgh a vedha sensys dhe vos dhe vlâmya rag clevejyow ha rag drogwharvedhyansow erel. In Ewrop y feu an bledhydnyow dhyworth an pymthegves cansvledhen bys i’n seytegves cansvledhen an uhelboynt a’n grejyans kebmyn in gwrahas, hag i’n dedhyow-na lies benyn inocent ha dyweres a veu acûsys a vos gwragh, tries ha gorrys dhe’n mernans. Onen a’n lyfryow moyha a bris o Malleus Maleficarum dyllys in Speyer, Jermany i’n vledhen peswardhek eth deg whe. An auctour o Heinrich Kramer, prownter Catholyk. In y lyver yma va ow tampnya gwrahas avell heretykys agus ow comendya tormentyans avell an fordh welha dhe wil dhodhans confessaya aga fehosow. An lyver Malleus Maleficarum (Morthol an Dhrogoberoryon) a veu condempnys gans an Inqwysycyon, saw y feu va praisys gans an Pab, an Êthves Inocent. Yth esa an Kensa Jamys (an Wheffes Jamys in Scotlond) ow cresy yn crev in gwrahas. Y les i’n tebel-artys a dhalathas gans hager-awel wàr an mor sordys, dell esa ev ow cresy, dre wrahas esa ow whelas y ladha ha’y venyn brias nowyth. Orth dyweth an whêtegves cansvledhen y feu lies benyn in Scotlond acûsys a vos gwrahas hag a lavurya warbydn an gùrun. Lies anodhans a veu gorrys dhe’n mernans. Pelha i’n vledhen pymthek naw deg seyth Mytern Jamys y honen a dhyllas y lyver warbydn wrahas in dadn an tîtel Daemonologie. Pàn veu Jamys gwrÿs mytern a Bow an Sowson, Shakespeare a screfas MacBeth, gwary usy an teyr gwragh persons a bris ino. Mar teun ny ha redya MacBeth gans rach bytegyns, ny a wel nag eus dùstuny vÿth fatell o Shakespeare y honen perswâdys a bower a wrahas. Onen a’n gwetha examplys a dharsewyans gwrahas a wharva in Massachusetts i’n Pow an Sowson Nowyth orth dyweth an seytegves cansvledhen. Lies huny, spessly benenes, a veu acûsys a vos gwrahas; meur anodhans a veu drÿs dhyrag an gort, dampnys ha cregys. An re-na neb a wrug aga acûsya a sùffras collva a neb sort pò cleves pò myshef a neb sort aral hag a vlâmyas aga hentrevogyon, spessly ow terivas fatell wrussons y gweles an venyn acûsys ow cowethya gans an Jowl. In airgelgh pûrytan Massachusetts dùstuny a’n sort-na a veu degemerys heb qwestyon. Deg person warn ugans a veu kefys gylty, nawnjek anodhans a veu cregys (peswardhek benyn ha pymp den). I’n dedhyow warlergh hedna oll an re cregys a veu glânhës a bùb trespas. Dell welsyn ny Kyng Jamys a gresy fatell wrug gwrahas sordya enawel in udn whelas y ladha; kyns ès ny dhe wherthy adro dhe fug-cregyans an mytern, hèn yw dhe styrya y hyll gwragh pò pystrior sordya hager-awel, gesowgh ny dhe remembra geryow Nicholas Boson ow tùchya an hudor Kernowek Hary Hermyt: Why a wra cavas dr’yw an gwas Hary-ma podrak brâs: kensa, orth an hager-awel ujy va ’gwil do derevel warnan ny kenyfer termyn dr’eron ny ’mos dort Pedn an Woles do Syllan.