(504) 'France' in Kernowek - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

An ger rag ‘France’ in Kernowek yw Frenk, Frynk. Yma hedna destys i’n tyleryow usy ow sewya: Wàr tua Frynk festynyn (Bêwnans Ke); ha ùja hedda mos dha Frenk (NBoson); Mytern Frynk, th’era vy ow mênya; (John Tonkin); Nena e’ êth ’ker’ rag Frynk (John Tonkin). Pelha yma Lhuyd ow ry dhyn knofen Frenk ‘nut of France’, hèn yw ‘Walnut’; ha Pockys Frenk ‘pox of France, Syphilis.’ An hanow Kernowek Frynk, Frenk yw an keth tra avell Ffrainc ‘France’ in Kembrek. Yma Frynk ha Ffrainc ow tos dhyworth an ragform *Franki ‘Francas’. Yth yw hanow an bobel yw tregys i’n pow ûsys rag hanow an pow y honen. An ûsadow-na yw gwelys in henwyn erel, rag ensampyl, Cymry ‘Welshmen’ ha Cymru ‘Wales.’ Y yw an keth hanow hag ymowns y aga dew ow tos dhyworth an ragform *Kombrogi ‘Kestrevesygyon’; pelha yma Kernow ow tos dhyworth an ragform *Kornowii, hanow an bobel esa tregys in west pelha a’n soth a Vreten Veur. Warbarth gans an ger rag Frynk ‘France’ yma an ger rag an tavas ‘French’ kefys i’n textow. Otta an examplys: awos bos an Frenkek fin parys dha kemeres wàr an eyl (NBoson); In Frenkek ha Kernowek deskys dâ (JBoson). Pelha yma Lhuyd owth ûsya Frenkek ‘French’ dywweyth. Yma Frenkek ow tos dhyworth an ragform *Frankika hag ytho yma va kelmys yn istorek gans an ger Frenk, Frynk. Saw gesowgh ny dhe dhewheles dhe’n ger Frynk, Frenk y honen. An udn excepcyon ow tùchya hanow Frynk i’n bÿs Keltek yw an form ûsys in mesk pobel an Vreten Vian. Yma an Vretonyon ow qwil devnyth a Bro C’hall. Y hyll an hanow-na bos styrys avell ‘Pow an Galas.’ Dell hevel yth esa Brethonyon Breten Vian owth ûsya an hanow Bro C’hall yn avarr hag ytho kyns ès an Francas, trîb Jermanek, dhe vôvya dhyworth Jermany dhe vos anedhys in Gal an Romans. I’n lacka prÿs yma certan Kernowegoryon ow consydra *Pow Frynk dhe vos an Kernowek rag ‘France’. Nyns yw hedna gwir; errour ywa. Gesowgh ny dhe examnya rag tecken an hanow Bro Ch’all rag yth ywa a les dhyn. Yma Bro in câss nomynatyf ha C’hall < Gall yw an pêwek liesek (‘genitive plural’). A pe form gans Pow compes in Kernowek rag ‘France’, an hanow-na a via kepar ha Bro C’hall in Bretonek: Pow i’n nomynatyf ha’n secùnd element a via *Frank, hèn yw dhe styrya an pêwek liesek. Saw apert yw na yll *Pow Frynk gans *Frynk i’n plûral nomynatyf bos degemeradow avell form gompes. Ny a vynsa gwetyas *Pow Frank. Hag ytho nyns yw keswharvedhyans nag yw *Pow Frynk kefys i’n tyller vÿth nag in text vÿth. An Gerlyver Meur a veu dyllys gans Kesva an Tavas Kernowek i’n vledhen udn vil ha naw. Ino yma rÿs dew hanow rag tiryow nag yw kefys in tyller vÿth: *Pow Sows ha *Pow Frynk. An hanow ewn rag an eyl yw Pow an Sowson ha rag y gela Frynk. An Kernowek compes rag ‘France’ yw Frynk, Frenk < *Franki; nyns yw kefys ken form vÿth i’n tavas tradycyonal. *Pow Frynk yw errour ha gwell via y ankevy.