(507) 'Pow, Bro' - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma lies ger in Kernowek rag ‘land, country’, rag ensampyl, tir, tireth, gwlas, gwlascor. Saw hedhyw me a garsa côwsel yn udnyk adro dhe dhew er rag ‘land,’ ha ‘country,’ hèn yw dhe styrya pow ha bro. Yth yw pow an ger moyha kebmyn rag ‘country, land’ hag yth ywa ûsys in moy ès udn gettesten. Onen a’n lavarow kebmyn gans an ger yw i’n pow-ma. Ot obma nebes examplys: ow masons i’n pow-ma (Origo Mundi); nyns eus den vÿth i’n pow-ma a whetho gwell (Passio Christi); neb a dawo i’n pow-ma dhyrag jùj, ny vÿdh jùjys (Passio Christi); ladron meur eus i’n pow-ma lies den ow testrûya (Bêwnans Meryasek). lavar aral yw i’n pow adro; Jesu Crist in pow adro pùb eur oll pregoth a wre (Passyon agan Arlùth); tra ny vÿdh i’n pow adro na wothfo dhe dherivas (Origo Mundi); ha pelha adro i’n pow: dhyworthowgh mennaf mones adro i’n pow (Resurrexio Domini); me a vynn kyns es hedhy mos alemma ha gwandra adro in pow (Creacyon an Bÿs). Yth yw pow ûsys inwedh in henwyn tyleryow hag yma lies exampyl a hedna in textow an Kernowek Dewedhes. Rag ensampel yma Wella Rowe ow screfa Pow Jûda, Pow Zebalon ha Pow Neftaly. Yma Keigwyn ha Lhuyd owth ûsya an lavar Pow Kernow. Yma Nicholas Boson ow screfa in pedn west Pow Densher, hèn yw rag pedn west Dewnan ‘Devon’. Pelha Wella Gwavas a scrif Pow Ameryca ‘America’ ha Pow an Brethon ‘Britain.’ Yma John Tonkin ow screfa Pow an Flemyn rag ‘Flanders’. Yma certan re hedhyw ow leverel *Pow Frynk rag ‘France’ saw hèn yw errour. An Kernowek rag ‘France’ yw Frynk yn sempel. Nyns yw form liesek a pow destys i’n textow saw yma pobel ow soposya *powyow dhe servya avell plûral. Apert yw bytegyns fatell o an ger pow kebmyn in Kernowek tradycyonal. Yma ger aral kefys i’n textow rag styrya ‘country, land’. Hèn yw bro, hanow benow. Yth hevel fatell o ha fatell yw an ger-na kerys gans Kernowegoryon agan dedhyow ny, in radn, dell hevel drefen bro ‘land, country’ dhe vos kebmyn in Bretonek. Versyon Bretonek a Hen Wlad fy Ndadau ‘Old Land of my Fathers’ yw Bro Gozh va Zadoù. Ha’n trailyans Kernowek yw Bro Goth ow Thasow. Pelha wàr batron Bro-Saoz ‘England’ in Breton Nance a gomendyas Bro Sows in Kernowek. Pow an Sowson yw an udn form rag ‘England’ kefys i’n tavas avês dhe Inglond in Tregear. Res yw avowa ow tùchya bro bytegyns, nag yw an ger-na kebmyn i’n tavas hengovek. I’n contrary part yth hevel nag yw an ger bro kefys ma’s unweyth yn udnyk i’n textow Kernowek—in Passyon agan Arlùth:

Rag henna Pylat a ros

dhe’n varhogyon aga ro,

may lavarsens ha dolos

in pùb tyller dres an vro,

dhe vos tus ervys i’n nos

warnedha kemmys adro,

nag êns y hardh dhe wortos

lemen oll mones dhe’n fo.

Dre rêson nag yw bro kefys ma’s unweyth, ha nag ywa kefys ma’s in Passyon agan Arlùth, an moyha avarr a’n textow hir, yn udnyk, yth hevel dhybm y vos gwell dre vrâs ûsya pow in y le.