(508) Sweeney Todd - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In cres an nawnjegves cansvledhen y feu dyllys in Loundres an whedhel hir ‘the String of Pearls’ in jornal euth henwys the People’s Periodical. Yma an whedhel ow terivas a varvor in Loundres gelwys Sweeney Todd. I’n versyon gwredhek Todd yw barvor usy ow ladha y vyctyms dre dedna colpes pò ‘lever’ hag y a’ga eseth in chair rag bos dyvarvys. Yma an cliens ow codha warlergh an kilben dre drapdharas wàr nans dhe’n leur iselha. Mar nyns o terrys aga hodna solabrÿs, Todd a wre trehy aga briansen gans alsen pò ‘razor.’ Mêstres Lovett, y garores, wosa kemeres aga mona dhyworth aga horf, a wre gweres Todd owth ûsya aga hig rag gwil pastys. Ena hy a wre gwertha an pastys in hy shoppa. Yth esa shoppa barvor Sweeney Todd in Strêt Fleet ryb Eglos Dùnstan, hag yth o va kelmys dhe shoppa Mêstres Lovett in Bellyard dre dremenva in dadn dhor. Adro dhe’n keth bledhydnyow-na y feu dyllys versyon hirha a’n whedhel, an eur-na in dewdhek radn ha peswar ugans. Ena y feu an whedhel dyllys in form a lyver in dadn an tîtel ‘The String of Pearls’, gans an istîtel ‘Barvor Strêt Fleet: Romans Teylu.’ An lyver may feu dyllys an versyon hir a’n jeva moy ès seyth cans folen. Versyon lienledrys ‘plagiarised’ a welas golow an jëdh adro dhe’n dedhyow-na i’n Stâtys Udnys i’n dadn an tîtel ‘Sweeney Todd: pò ‘The Ruffian Barber: A Tale of Terror.’ Screfys veu hedna gans den a ûsyas an fug’hanow ‘Captain Merry’. Kyns ès oll radnow a’n kensa versyon a’n whedhel dhe vos pryntys, den gelwys George Dibdin Pitt a wrug askewera an whedhel rag gordhrâma pò ‘melodrama’ gwaries i’n Gwaryjy Britannia in Hoxton, Loundres Ÿst. Kynth usy certan re ow cresy fatell o Sweeney Todd person istorek, apert yw na yll hedna bos gwir. I’n contrary part yth hevel fatell o an whedhel fùndys wàr narracyon cotha, hèn yw dhe styrya whedhel in dëdhlyver an viajyor Swêdek Pehr Lindeström dhyworth cres an seytegves cansvledhen. Dell hevel y wharva manylyon an whedhel in Calais in north a Frynk. Yth yw oll an whedhel dhe gafos in narracyon Lindeström; an udn dyffrans yw hanow an barvor. Yma ken versyon a’n whedhel whath derivys adro dhe daclow a wharva i’n vledhen mil eth cans in la Rue de la Harpe in Parys. Y feu dyllys an versyon-na in Tell-Tale Magazine in Loundres in dadn an tîtel ‘A terrific story of the Rue de la Harpe’. An avîs kensa fatell o Sweeney Todd person istorek a veu gwrës in dyllans a ‘The String of Pearls’ a’n vledhen êtek ha hanter-cans. In agan dedhyow ny Peter Haining jornalyth re argyas fatell o Sweeney Todd caracter istorek hag ev dhe vos gwythresek adro dhe’n vledhen mil eth cans. In spît dhe hedna istoryans erel re whythras an negys ha ny gafas den vÿth anodhans dùstuny vÿth dhe scodhya damcanieth Haining. Mars o Todd gwirberson, fatl’ylly ev keles oll an corfow ha prag na wrug den vÿth y dhrogdyby? Res yw dhyn meneges nag o Sweeney Todd person istorek ha rag hedna an whedhlow adro dhodho yw fuglien.