© 2025 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yma an ger tre kebmyn in Kernowek hag ev a’n jeves moy ès udn styr. An sens gwredhek yw ‘chy tiak, bargen tir’; gans an mênyng-na yma va pòr gebmyn in henwyn tyleryow, rag ensampel Trenowyth, Trevian, Tregarrek, Trelogosek ha Treneglos. Yma an ger tre gwelys kefrÿs in henwyn tyleryow i’n element Hendre > Hendra ‘chy coth, chy rag an gwâv’. Dhyworth an sens ‘chy tiak’ an ger tre a dhalathas styrya ‘home’; yth yw hedna kefys rag ensampel in: ha wàr tu tre fystenens kefrÿs marhek ha sqwier (Origo Mundi); gwell plêsys me a via so mot y go ty dhe drega in tre omma genef vy (Bêwnans Meryasek); Meryasek, welcùm in tre ha’m leun-vaneth y rov dhis (Bêwnans Meryasek); Tormentours, êns pùb dhe tre hag aspiowgh in pùb le mar kêws den vÿth er ow fynn (Resurrexio Domini); alemma deun ny dhe tre ha leveryn in pùb le dell wylsyn ny Jesu y vos dasserghys (Resurrexio Domini); How, serys! Pyw eus in tre? Neyth heb oy otta omma (Bêwnans Meryasek); Cubmyas teg ev a kemeras, ha tu ha ha tre ev a travalyas (NBoson); Mars yw dhis duwhan gwysca an corn, roy e tre arta (Oliver Oldwanton). Styr an lavar dewetha-na yw hebma: ‘mar nyns osta plêsys dha wreg dhe vos dyslel dhis, gwra cùsca gans gwreg hy haror hy.’ Mars esa tre ow styrya ‘home’, ena yth esa adre ow styrya ‘from home’, rag ensampel i’n lavarow-ma: ny re dheuth omma adre in govenek exaltya Meryasek yn pòr certan (Bêwnans Meryasek); êth ev adre me ny wòn (Bêwnans Meryasek). Ena yma tre ow styrya ‘town’, rag ensampel: ha kemmys y a’n cablas may feu an dre crehyllys (Passyon agan Arlùth); pyw henna a dheu dhe’n tre wàr keyn asen hag ebal? (Passio Christi); Arlùth, ny â dhy wharê rag ny yllyn in neb tre trega dres nos (Resurrexio Domini); Sîmon Peder, mab Joannes, dhia’n provyns a Galylê, ha dhia’n dre a Bethsaida (Tregear). Yma dyw form liesek dhe’n ger tre. An kensa yw trevow, usy ow styrya ‘towns’, rag ensampel: in le mayth en i’n trevow yn splann me a’s derivas (Passyon agan Arlùth); Mir, lowena oll an bÿs, cytas rych, trevow a brys, castylly brâs hag uhel (Passio Christi); oll governans gwlasow, an pow, an trevow marhas, ha’n trevow trigva (Tregear); yma ow leverel fatell wrug Duw plâgya cytas, trevow, ha pow, rag y recêva ùnwordhy gans lies kynda a plâgys (Tregear); scodhys gans mar gay trevow leun a tus ha mar teg teclys (Keigwin). An secùnd plûral yw treven hag yth yw hedna ûsys avell an form liesek a chy ‘house.’ Ot obma nebes examplys: Neb a garra y das pò y vamm, y vab pò y vyrgh, chy, treven po tiryow moy agesof vy, yn medh Crist, nyns yw wordhy dhe vos dyscypyl na servont dhymm (Tregear); Ny dâl dhywgh gwil treven wàr an treth (JJenkins); Kêwgh ogas dha’y dreven ha bedhowgh why lowen (TBoson). Pelha Lhuyd a lever ‘Chy, plûral Treven.’ Nyns yw ken liesek a’n ger chy kefys i’n tavas tradycyonal hag ytho ny goodh dhe’n form *chiow bos ûsys.