© 2025 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yma pobel Albânya ow referrya dhodhans aga honen avell Shqiptarët. Yth yw an hanow-na convedhys yn fenowgh avell ‘mebyon eras (eagles)’, saw moy lyckly yw an hanow dhe sygnyfia ‘pobel usy ow côwsel shqip,’ hèn yw an tavas Albânek. An pow y honen yw gelwys Shqipëria. Dell yw ûsys yma an Albânyans ow consydra aga honen dhe vos devedhys dhyworth Illyryans an Bÿs Auncyent; aga thavas yw a’n teylu Eynd-Ewrôpean. Yth esa an Illyryans tregys in cres Ewrop orth dallath Oos an Brons, saw y a wandras dhe’n soth hag anedhy in Albânya adro dhe dhyw vil bledhen dhyrag Crist. I’n jëdh hedhyw yma an Albânyans kefys in Albânya hy honen hag in Kosôvô. Agnes Bojaxhviu (gwell aswonys avell Mabm Terêsa) a veu genys i’n vledhen nawnjek ha deg in Skopje, Macedoyn, i’n dedhyow-na radn a’n empîr Otoman. Hy mêny a dheuth dhyworth Kosôvô. Agnes yw martesen an Albânyanes gwelha aswonys a’gan dedhyow ny. Gorour nacyonal Albânya yw gelwys Skanderbeg. Ev a veu genys Gjergj (Jory) Kastrioti i’n vledhen mil peswar cans ha pymp; y das o Djon (Jowan) Kastrioti, pensevyk Emathya, provyns in North a Grêss. Yn avarr in y vêwnans Gjergj a veu rÿs avell gwystel dhe’n Sowdon Otoman. Gjergj a recêvas y dhyscans in Edirne (Adrianopolis), cyta hedhyw in Tùrky Ewrôpean. An Otomans a’n henwys Iskander, warlergh Alexander Meur, hag y a addyas an sylaben bey, beg ‘den nôbyl’. Pàn veu an Tùrkys fethys in batel Nysh in Serbya, Skanderbeg a forsâkyas an Otomans ha jùnya dhe’n Albânyans y gestrevesygyon. Pelha ev a forsâkyas Islam hag a dhegemeras Cristoneth catholyk. Ev a gemeras arta tiryow y deylu hag i’n vledhen mil peswar cans peswar deg peswar ev a restras kesudnyans a bensevygyon Albânyan rag omlath warbydn an Otomans. I’n bledhydnyow mil peswar cans peswar deg peswar dhe whe deg whe ev ha’y gowetha a spêdyas dhe worra an Tùrkys dhe’n fo tredhek treveth. Awos y sowena ow herdhya luyow an Sowdan wàr dhelergh, ev a veu an gwerrour moyha kerys a Vrâstir Ewrop. Dres an bledhydnyow ev a gefy gweres dhyworth Nâpel ha Venys. An Pab, an Tressa Calyxtùs, a ros dhe Skanderbeg an tîtel a Gapten Jeneral a’n Sê Sans. Bys in dedhyow y vernans Skanderbeg a spêdyas dhe sevel orth pùb goreskyn a’n Tùrkys. Skanderbeg a verwys i’n vledhen peswardhek whe deg eth hag ajy dhe dheg bledhen y dhynas in Krùjë a godhas dhe’n Tùrkys. Albânya a bassyas dhe’n empîr Otoman ha’n pow a sùffras lies bledhen a dhyberthva hag a rêwlyans estren. Hedhyw yma adro dhe dhewgans mil Albânyans tregys in Soth a Italy. Y yw dieskynysy a’n re-na a wrug fia dhyworth an Tùrkys wosa mernans Skanderbeg. An tavas usons y ow côwsel yw Albânek pòr goth hag ymowns y ow kelwel aga honen Arbërëshët kyns ès Shqiptarët. An radn vrâssa a’n Albânyans in Italy yw Catholygyon. Bydner re wrellyn ankevy, y pàn veu Albânya in dadn rêwl Enver Hoxha, Comûnyst, hèn yw dhia mil naw cans peswar deg peswar bys mil naw cans eth deg pymp, Albânya o stât dydhuw. In oll an termyn-na y fedha Cristonyon ha Moslems persecûtys yn harow.