© 2025 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
An ger ûsys in Kernowek rag ‘morning’ yw myttyn, mettyn. An form mettyn yw kebmyn i’n tavas dewedhes, kynth yw metin destys in Gerva an Kernowek Coth. Dell hevel yma myttyn, metten ow tos dhyworth an gnas-er Latyn matūtinus ‘a’n myttyn’. Ot obma nebes examplys a’n ger myttyn, mettyn i’n textow Kernowek: An varhogyon a gùscas myttyn ha’n jÿdh ow tardha (Passyon agan Arlùth); Ass yw wheg an hun myttyn (Origo Mundi); ha dhymm y a worthebys y fedhons myttyn parys kettep onen (Origo Mundi); pàn sefsys hedhyw myttyn, certan yagh êns aga gyew (Passio Christi); Yth yw scryfys fatell wrug Peder kemeres warnodho in presens a oll an appostlys dhe gows in aga hanow y oll dhe’n bobel wàr de Fencast myttyn (Tregear); rag gordhuwher ha myttyn nynj eus dhyn ny mar dhâ car (Bêwnans Ke); I’n mettyn pàn owgh why ’sevel, why a res cows dha gàs tas ha’gàs dama (Pryce); Ma gwreg vy ’pobas mettyn (Lhuyd); ha nessa mettyn an gwadn-wre’ty, hy a dhalathas dha wil cry’ ter o hy dremas destrîes (Lhuyd); Cabmdhavas i’n mettyn glaw ’yll bos etten (Pryce); Mortîd a mettyn tra vÿth ny dâl (Pryce). Yma dew lavar erel in Kernowek usy ow sygnyfia ‘early morning, break of day, dawn.’ An eyl yw dëdhtardh ‘daybreak’ in gerva Pryce. Y gela yw an lavar terry an jëdh rÿs dywweyth gans Lhuyd gans an styr ‘crepusculum, morning twilight’ i’n eyl tyller ha ‘diluculum, twilight, dawn’ in y gela . Yma ken ger whath ûsys traweythyow gans Kernowegoryon a’gan dedhyow ny rag ‘morning’; an ger-na yw *bora, kyn nag yw an ger bora y honen oll kefys in tyller vÿth i’n tavas. Bore gans e avell an vogalen dhewetha yw an ger Kembrek rag ‘morning’. Dell hevel Kembrek bore yw goos nessa an form *bárach gwelys in imbárach ‘avorow’ in Godhalek Coth, amárach ‘avorow’ in Godhalek Arnowyth. Yma scoloryon ow cresy fatell usy bore in Kembrek ha *bárach in imbárach in Godhalek ow tos dhyworth ragform kepar ha *bó-ad-rego- ‘prÿs rag kelmy an ojyon dhe’n aradar’. Dell hevel yth yw avorow ‘tomorrow’ in Kernowek dhe styrya avell ger growndys wàr *bó-ad-rego- inwedh. Yma an form bore- gwelys in Gerva an Kernowek Coth in boreles ‘plans an myttyn, egor Duw, daisy.’ Pelha yma *bore complys gans Lhuyd i’n adverb Kernowek boregweyth ‘on a morning, one morning’. Dre lycklod y feu boregweyth in Kernowek desmygys gans Lhuyd y honen wàr batron an ger boregwaith ‘one morning’ in Kembrek. Nyns eus dùstuny vÿth fatell o an ger boregweyth bythqweth radn a erva an Kernowek teythiak. Nyns eus dùstuny vÿth naneyl fatell o *bore po *bora avell ger y honen oll dhe gafos in tyller vÿth i’n tavas tradycyonal. Yma certan Kernowegoryon hedhyw i’n jëdh ow leverel *bora in lavarow kepar ha *Bora dâ! *Bora brav! Nyns yw compes an re-na. I’n lacka prÿs an lavar *Bora Brav yw tîtel lyver rag dyscoryon Kernowek dyllys nans yw nebes bledhydnyow gans Kesva an Tavas Kernowek. Yma William Pryce ow ry dhyn Mettyn dâ dhe why! Nyns yw an tîtel Bora Brav dhe gomendya. Y talvia bos amendys dhe Myttyn Dâ.
Gwelyr an artykyl podcast nyver (319), kefrës gans Nicholas Williams, ha’n keth testen examnys etto