© 2025 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Dhyworth dallathfos an dasserghyans Kernowek an ger rÿs i’n gerlyfryow rag ‘to hope’ o gwaitya (spellys <gwaytya>). Ha’n ger rag an hanow ‘hope’ o gwaityans. Nyns yw compes naneyl an eyl na’y gela. Kyns oll gesowgh ny dhe veras orth an verb ‘to hope’. Warbarth gans an styr ‘to expect, to hope’ yma an ger gwaityaf ow mênya ‘be on the watch, take care’, ha dell yw ûsys yma va owth apperya i’n gis gorhemynek. Merowgh orth an examplys-ma: Tommas, lemmyn gwait cryjy an Arlùth dhe dhasserhy (Resurrexi Domini); Ha pàn vesta saw ha glân, gwait dystrûya yn tien oll templys an fâlj duwow (Bêwnans Meryasek); gwait yn teg y gonfortya ha gans henna y dhesky (Bêwnans Meryasek); drog nefra gwait na wrylly (Bêwnans Meryasek); Gwait gwarnya Mytern Mêdes ha Mytern Grêk maga sur may fowns genef dysempys (Bêwnans Ke). Yth esa Nance ha pobel erel a’n dasserghyans avarr ow cresy fatell o *gwaitya an verb-hanow ewn, kyn nag o hedna dùstunies i’n tyller vÿth. Yth yw an verb-hanow compes kefys dywweyth in pregowthow Tregear, kepar dell usy ow sewya: Pana dra a wren ny gwetyas dhyworth Duw alemma rag mar teun ny ha peha ha’y ankevy ev? ha In aga oberow a’n par-ma fatell yllons gwetyas favour a dhêwla aga Thas a nev, hag y mar spîtfùl, ow despîsya an corf ha’n goos a’gan Savyour Crist y vab ev? Gwetyas ytho yw an verb-hanow compes a’n verb gwaityaf. Coynt yw martesen na wrug Nance ha’y gowetha convedhes hedna, rag yth o form a’n verb gwetyas destys tergweyth i’n tavas dewedhes: unweyth gans Nicholas Boson: Gàn tavas Kernowek yw mar pell gwadnhës, as na yllyn scant qwatyas dh’y weles crefhe arta; ha dywweyth in bardhonek John Tonkin Menja tus Kernowek bùs gosowes:
Mytern Jamys wrug qwachas y stoppya
bùs e’ na alja, yth êth dha gloppya;
Ev a wrug qwachas mos dha’n gwella ternewen
bùs e’ godhas dres in duwhan.
Dre lycklod y feu Nance lêdys wàr stray der an trailyans cales wàr an kensa kesson i’n tavas dewedhes; hèn yw quatyas, qwachas < gwetyas. Rag an hanow ‘hope’ yma Nance ow comendya gwaityans, saw nyns yw hedna destys in tyller vÿth. Y feu an ger gwaityans desmygys gans Nance wàr fùndacyon an verb *gwaitya. In gwiryoneth an ger rag ‘hope’ i’n tavas tradycyonal yw govenek. Dell hevel govenek yw goos nessa goanag ‘espoir, hope’ in Bretonek. Ottobma an examplys a’n ger govenek i’n textow Kernowek: ro dhymm dha vanneth perfeth rag dhymm yma govenek cafos dhe gens tregereth (Origo Mundi); ny re dheuth omma adre in govenek exaltya Meryasek yn pòr certan (Bêwnans Meryasek); Me yw pÿs dâ magata ha govenek dhymm yma pòr welcùm y fëdh dhyn ny (Bêwnans Ke); Nyns eus dhyn naneyl fëdh, govenek, charyta, pacyens, chastyta, na tra vÿth aral yw dâ, ma’s dhyworth Duw oll ymowns ow tos (Tregear); ow tallath gans merclys, noryshys gans govenek, encressys gans charyta, ha confyrmys gans antyqwyta (Tregear). Yth hevel dhybm ytho fatell yw gwell sevel orth ûsya rag ‘hope’ *gwaityans, ger desmygys, ha gorra an ger warrantus govenek in y le.