© 2025 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
In y erlyfryow Kernowek rag ‘place’ yma Nance ow ry le. Yma le ow styrya ‘place’ heb mar, saw yth yw pòr strothys an devnyth gwrÿs anodho. Nyns yw an ger le kefys i’n tavas tradycyonal ma’s in certan ketestednow stag. An re-na yw: in neb le, rag ensampyl: hy re gafas diogel dor dysehys in neb le (Origo Mundi); ny gaffen wàr ow lowta compossa prenn in neb le (Origo Mundi); my ny welys benyn dhymm a wel plekya whath in neb le (Origo Mundi); me a gùssul bos gansa prenys dâ—gûn in neb le (Passio Christi); hag in pùb le, rag ensampyl: ha why genef re dregas in temptacyon in pùb le (Passio Christi); y whren dha vodh oll in pùb le pòr wir nefra (Resurrexio Domini); hag aspiowgh in pùb le (Resurrexio Domini). Pelha yth yw le kefys inwedh i’n rag-ger in le ‘instead of,’ rag ensampyl: in le ow dyllas owrlyn, pùrpur pannow fin certan, lemmyn me a wysk qweth loos (Bêwnans Meryasek); ha kyrwas gwyls pòr prety aragtha in le ohen (Bêwnans Ke). Ha heb mar y hyll le bos gwelys in alemma < a’n le-ma ‘hence’ hag alena < a’n le-na ‘thence’. Nyns yw form liesek *leow kefys i’n tyller vÿth. Apert yw ytho fatell yw pòr lymytys ûsyans an ger le. Onen a’n geryow kebmyn rag ‘place’ yw tyller pò teller. Otobma nebes examplys a tyller: yma Duw i’n tyller-ma (Origo Mundi); drewgh bys omma dhe’m tyller an harlot gwas (Passio Christi); rag painys pàn na’n jevo tyller dh’y penn (Resurrexio Domini); Sen Cypryan, in lies tyller yma ow affyrmya hemma (Tregear); i’n eur-na tyller nyns o (Bêwnans Ke). Hag otobma nebes examplys a teller: dhe Crist y benn py sensy teller vÿth nynj o kefys (Passyon agan Arlùth); rag genes in pùb teller parys ov dhe lavurya (Origo Mundi); abàn êthe dhe’n teller (Passio Christi); dhe teller dâ re’m gedya gordhya Crist ker may hallen (Bêwnans Meryasek). Pelha yma an form liesek a tyller gwelys in Passyon agan Arlùth: dhe’n edhyn gwyls rag neythy tyleryow esa parys. An ger rag ‘place’ moyha kebmyn i’n textow Kernowek, bytegyns, yw plâss, rag ensampyl: glan ev re gollas an plâss a’m leuv dhyghyow (Origo Mundi): rag yma boos parusys dhyso ha dhedha kefrÿs i’n plâss eus omma rybon (Passio Christi): me a veu in kert a tan dhe’n keth plâss-ma kemerys (Resurrexio Domini); Omma me re fùndyas plâss ryb Maria a Cambron (Bêwnans Meryasek); yth esof inha dhe’m plâss ès dell desefsen ow bos (Bêwnans Ke); ha pàn deffasta dhe’n plâss, ty a gyv i’n yet udn êl (Creacyon an Bÿs). Herwyth gerlyver wàr lînen an Academy Kernowek yth yw Kernowek Cres an form tyller saw an form teller yw Kernowek Dhewedhes. Nyns yw hedna gwir poynt; dell welsyn ny a-uhon; teller yw kefys liesgweyth in Kernowek Cres. Pelha yma an gerlyver ow leverel kefrÿs fatell y’n jeves an ger le an liesek *leow. Nyns yw hedna compes na neyl. Y cothfia dhe’n Academy Kernowek êwna aga gerlyver wàr lînen ow tùchya an dhew er le ha tyller. I’n tor’-ma yma an gerlyver ow lêdya Kernowegoryon wàr stray.