(519) Dewosow Medhow - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Salm cans ha peswar a lever dhe Dhuw: Yth esta ow qwil gwin rag lowenhe colon mab den. An epscop in Origo Mundi a lever an keth tra ow tùchya gwin: Wosa henna evyn pùb oll adro draght a win rag confortya y golon. Merkyowgh fatell yw rudh an gwin yw complys in Bêwnans Meryasek, pàn lever an oberwas (Calo): I’n tavern sur owth eva ymowns pòr rudh aga min. Ha herwyth Andrew Borde pobel a wre eva meur a win, rag in y gescows i’n tavern, den a lever: Gwreg, drewgh qwart gwin dhe vy. Qwart gwin yw dew bynta—pò moy ès udn lîter a win rag den y honen oll. Avês dhe win yma an textow Kernowek ow côwsel a dhewosow erel, rag ensampyl: cîder ha coref. Yth yw cîder complys dywweyth in Bêwnans Meryasek. Kyns oll Meryasek a lever adro dhodho y honen: ny evaf cîder na gwin, na dewas marnas dowr pur. Wosa mernans Meryasek an deyn a lever adro dhodho: gwin na cîder ny ûsya. Ow tùchya coref, yth hevel fatell eus dyw form a’n ger i’n tavas hengovek. An form moy adhewedhes yw cor, ha hòn yw kefys in gwersyow Jamys Jenkyn: Ha why ’ell eva cor gwelha mars eus dywgh brag. An form moy avarr yw coref ha hèn yw kefys in Kernowek Coth. Yma Lhuyd in Archæologia Britannica worth y spellya *korev, hèn yw gans <v> avell an kesson dewetha. Saw an sylaben dhewetha yw diaken ha dylef; ytho res yw y leverel ['koref] gans [f]. An leveryans gans [f] yw certan dhyworth an spellyans corff ‘beer’ in Bêwnans Meryasek: corff bò gwin a caffen vy, dowr ny efsen eredy. Yth yw dewosow erel complys i’n textow: gwyras ‘ardent spirits’ in Passio Christi, rag ensampyl, hag yma Borlase ow ry dhyn dowr tobm Frank ‘brandy.’ Yma Borlase inwedh ow ry dowr tobm lollas ‘rum’. Dre lycklod lollas ena yw camredyans rag *mollas hag yma dowr tobm mollas ow mênya ‘spirit of molasses.’ Heb mar nyns yw fur eva re a dhewosow medhow —dell lever Gwavas: Na wrewgh eva re, mès eva ra’gas sehes Ha hedna, moy pò le a vedn gwetha corf in êhes. Pelha nebonen a vo owth eva re yw gelwys penn medhow, rag ensampyl in Bêwnans Meryasek: yma Tewdar ow cably y servysy pàn lever ev: A pennow medhow, owt in ow dedhyow criaf warnowgh, ladron dreus! Apert yw kefrÿs fatell o eva re consydrys pehas poos gans an eglos, rag yma Tregear ow nyvera fara medhow in mesk an pehosow gans an lavar-ma: Sorr, strif, sedycyon, envy, mùrder, medhewnep, glotny ha re a’n par-ma. Mar teu nebonen hag eva re in gwir, ternos ev a wra sùffra an dra gelwys ‘hangover’ in Sowsnek. Rag ‘hangover’ in Kernowek me a gomend cùrun spern, lavar growndys wàr Vretonek Cres. Gwavas a re dhyn desmyk: Flogh a veu genys in mis Merth; ny a drehas y vygel in mis Est; ev a ros towl dhe prownter Pawl mis Du ken Nadelyk. An gorthyp yw ‘dewas medhow gwrÿs a varlys’. Dell hevel Prownter Pawl in dedhyow Gwavas o nebonen istorek a vedha owth eva re.