© 2025 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
An ger ûsys in Kernowek rag ‘evening’ yw gordhuwher. Hèn yw goos nessa ucher ‘evening’ in Kembrek Cres ha feascar ‘evening’ in Godhalek. Res yw comparya inwedh an ger Latyn vespera ‘evening.’ Nyns yw certan prag y cafas an ger Kernowek an rag-gorrans gorth- dhyragtho. Wàr neb cor yma gordhuwher complys rag an kensa prÿs in Gerva an Kernowek Coth le mayth eson ny ow qweles vesperum gurthuwer‘evening’. Yma examplys erel a’n ger gordhuwher gwelys in Trig genen, a goweth ker, rag namnag yw gordhuwher ha dewedhes (Resurrexio Domini); Gwait may whrylly dha dhevar gordhuwherow ha myttyn (Bêwnans Ke); ha Me a vedn gàs gweles arta gordhuwher (Lhuyd); Pelha lavar usy ow styrya ‘last night’ yw kefys in Bêwnans Meriasek in Ny veuv in scol re’m lêwta bys newher gordhuwher. An Kernowek rag ‘this evening, tonight’ heb mar yw haneth ha kebmyn yw hedna i’n textow, rag ensampel: I’n nos haneth kyns ès bos colyek clêwys, Peder, te a’m nagh tergweyth (Passion agan Arlùth) ha My re dhesîryas fest meur debry genowgh why haneth (Passio Christi). In haneth yma an secùnd sylaben dhe gelmy gans an ger nos; haneth ytho yw goos nessa Kembrek heno ‘tonight’, ha Bretonek Cres henoaz ‘tonight’. Yma an ger dworennos ow tos dhyworth dyworth an nos ‘at nightfall’ dhe weles in Passyon agan Arlùth ow tùchya Nycodêmùs: dworennos yn pur brena ev êth dhe’n corff o marow gans ùnyent dhodho esa ha spîcys a veur râssow. Rag styrya ‘at night, during the night’ yma Kernowek owth ûsya an lavar dres nos, rag ensampel prydyth Passyon agan Arlùth a lever arta ow tùchya Nycodêmùs: Ganso dres nos y wholyas in y servys neb o len; an nos-na a dremenas hag oll hy drog hag anken. Pelha ny a gav an keth lavar in Resurrexio Domini: rag ny yllyn in neb tre trega dres nos dell eus an Yêdhewon whath pùb eur worth agan arveth hag ow codros. Hag yma an keth lavar kefys in Bêwnans Maryasek kefrÿs: Me re beu in mes dres nos meur ow anwos ha’m ponvos. Yma lavar aral kefys in Bêwnans Meryasek yn udnyk; hèn yw mo ha myttyn: Jesu an mab leun a râs, socor ny mo ha myttyn. Nyns yw an ger mo kefys in ken tyller vÿth. Dell hevel yma va ow sygnyfia ‘tewolgow, darkness’. Rag hedna yma mo ha myttyn ow sygnyfia ‘in darkness and in the morning’, pò rag y leverel in geryow erel, ‘by night and by day.’ Wàr an dyweth yth yw ken lavar dhe weles in gerva dhornscrefys Edward Lhuyd i’n Lyverjy Nacyonal Kembra in Aberystwyth. An lavar in qwestyon yw ter an dhew wolow hag yma Lhuyd worth y styrya avell ‘twilight, dusk.’ In gwiryoneth yma ter an dhew wolow pò ‘inter an dhew wolow’ dhe ùnderstondya avell an termyn pàn vo sedhys an howl saw nag yw derevys an loor whath. Dell hevel yma lavar a’n keth sort kefys in Godhalek Wordhen, hèn yw idir an dá sholas ‘inter an dhew wolow.’ Dre lycklod yth esa tavaseth a’n sort-na dhe gafos in tavas an Geltyon avarr.