(521) 'John' in Kernowek - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In y drailyans a Awayl Sen Mark yma Caradar owth ûsya an form Yowan rag ‘John’—an Baptyst ha rag an dyscypyl. In y drailyans lies-screfys a Awayl Sen Lûk yma Talek owth ûsya Yowan kefrÿs. In y drailyans a Awayl Sen Mathew bytegyns, a veu dyllys in nawnjek tryugans ha pymthek, yma Gwas Cadoc (an Revront David R Evans) ow qwil devnyth a’n form Jowan rag an Baptyst ha rag an dyscypyl. In y drailyans a Awayl Sen Jowan a’n vledhen nawnjek peswar ugans ha peswar yma Gwas Kevardhu (Tony Snell) ow kelwel an dhew dhen-na Jowan, kepar ha Gwas Cadoc. Res yw dhyn govyn prag yma an dyffrans inter an dhyw form ha pandr’yw an dùstuny ragthans? I’n textow avarr an hanow ‘John’ yw screfys iowan— I O W A N. Hèn yw an spellyans kefys in Passyon agan Arlùth, in Passio Christi, in Resurrexio Domini hag in Bêwnans Meryasek. Pelha yma an hanow sen iowen baptyst kefys in Bêwnans Meryasek kefrÿs. Kyn whrug Caradar determya an spellyans I O W A N dhe sygnyfia Yowan, nyns yw êsy acordya gans y ervirans ev. Yma I-O gwelys orth dallath iowan saw yth yw I-O gwelys inwedh i’n ger ioy ‘joy’ in Passyon agan Arlùth, i’n Ordinalia hag in Bêwnans Meryasek, le mayth yw cler fatell yw res pronowncya ioy [dȜoi]. Yma an lavar an iovle ‘the devil’ spellys gans I-O kefrÿs, hanow gwelys liesgweyth in Bêwnans Meryasek, hag apert yw bos res pronowncya I-O i’n ger-na [dȜo] kefrÿs. A pe an scrîbys whensys dhe screfa y [j] orth dallath an hanow rag ‘John’, coynt yw na wrêns screfa Y kepar hag i’n geryow yowynk, yonk ‘young.’ In Tregear hag in Bêwnans Ke yth yw Jowan gans J (jê) avell an kensa kesson an spellyans in pùb tyller. In Jowan Chy an Hordh yma Nicholas Boson ow screfa Jooan gans J. Pelha in y versyon y honen a Jowan Chy an Hordh yma Lhuyd ow screfa Dzhûan in y system fonetyk y honen. Hag apert yw bos res ùnderstondya <Dzh> avell [dȜ]. Dell hevel yth esa Caradar ow cresy kensa kesson a’n hanow Jowan dhe vos Y [j] kyns ès J [dȜ], drefen an form Gembrek dhe vos Ieuan gans [j] ha’n form Vretonek dhe vos Yann. An dhyw form-na a dheuth yn tydro dhyworth an Latyn Iohannes; saw an form Gernowek a dheuth aberth i’n tavas dre Sowsnek Cres dhyworth Frynkek hag in Frynkek an Osow Cres an kensa kesson in Johan ‘John’ a vedha pronowncys [dȜ]. Dre lycklod an form Jowan a veu benthygys gans Kernowegoryon wosa Goreskyn an Normans i’n unegves cansvledhen. Dell hevel yth o kefys an hanow Yowan ‘John’ in Kernowek kyns ès devedhyans an Normans. Saw nyns yw an form-na dhe nôtya in Kernowek ma’s in udn tyller yn udnyk: Golowan ‘the Feast of St John’, hèn yw an peswora dëdh warn ugans a vis Metheven. Drefen nag eus ol vÿth a <J> [dȜ] i’n ger Golowan, ny a yll soposya fatell dheuth Golowan dhyworth *Gool Yowan. In Kernowek kenyver jorna, bytegyns, an hanow ‘John’ yw Jowan.