© 2025 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
An ger rag ‘bed’ in Kernowek yw gwely. Hèn yw an keth ger avell gwele in Bretonek ha gwely in Kembrek. Ymowns y aga thry ow tos dhyworth an ragform *wo-leg-yo- growndys wàr an wredhen *leg- ‘growedha; settya’. I’n Osow Cres pobel a wre cùsca wàr gala hag in Gerva an Kernowek Coth ny a gav cala gwely. Dell hevel y fedha padn gorrys wàr an cala, rag i’n keth tyller ny a red lien gwely. Rag cudha an cùscador y fedha ûsys dyllas gwely. Heb mar chif-ûsyans an gwely o rag cùsca, dell yll bos gwelys i’n textow tradycyonal; rag ensampel in Bêwnans Meryasek yma an beggyer noth ow lamentya na vydn den vÿth offra gwely dhodho dres nos dre rêson a hager-vrewyon y grohen: ny gar den ry dhymm gwely podredhek a’m esely drefen pòr wir ow bosa. Pelha in Jowan Chy an Hordh ny a red: Ha pà th’era Jowan i’n gwely, th’era toll i’n tâl an chy; ha ev a welas golow; ha e’savas in bàn amês y wely (Lhuyd). Dell yw an câss whath, an gwely o an tyller rag plesour carnal kefrÿs. Rag hedna Davyth a lever dhe Bersabe in Origo Mundi:…oll ow yêwnes pùpprÿs ty a vÿdh pòr wir nefra; groweth i’n gwely ahës may hyllyf genes cùsca. Pàn dheffa Jowan Chy an Hordh tre warlergh bos ow lavurya pell dhe’n ëst dres teyr bledhen, yma va ow perthy dowt nag yw y wreg lel dhodho. I’n whedhel ev a lever: Pà wrug avy dos dha’n daras me a vensa clôwes dên aral i’n gwely. Dell usy ow wharvos y wreg yw lel dhodho. Hy gorthyp rag styrya hy honen yw hebma: pà wrugowgh why mos kerdh, th’era vy gyllys try mis gen flogh, ha lebmyn ma dhe ny meppyk wheg i’n gwely, dha Dhuw re bo grassys. Yth hevel dhyworth hedna, na wre flehes an vohosogyon cùsca in aga gweliow aga honen, saw i’n gwely gans aga herens. Heb mar pàn vo nebonen ow cùsca in y wely, yma va in stât dyscôs. In whedhel Jowan Chy an Hordh an wadn-wre’ty ha’n managh, hy haror hy, ymowns y ow ladha gour ty an venyn dres nos hag ev in cùsk in y wely. An whedhel a lever: ha gans hedna, an wadn-wrê’ty gans hy follat a dhestrias an den coth i’n gwely. Mars yw nebonen parys dhe verwel, gwell yw merwel yn naturek —in y wely, kyns ès bos denledhys. Pelha mars eus nebonen ow merwel indelha, dre lycklod ny wra va ma’s leverel an gwiryoneth. Sacrament an Alter a lever: pàn vo an dewetha geryow clôwys a onen a vo in y wely mernans, ha parys dhe verwel, den vÿth ny lever a vos gow ganso ena. Yma benenes ow ton flehes i’ga gwely. Lhuyd a dherif dhyn benyn in golovas dhe vos an Kernowek rag ‘a woman in childbirth.’ Y hyll an lavar in golovas bos styrys avell in gwelyvos. Wàr an dyweth yma Wella Gwavas ow ry dhyn lavar na woryn ny tra vÿth adro dh’y gettesten—ywa descrefans pò despît; an lavar-na yw caha i’n gwely ‘shit-a-bed.’